Policia e Shtetit ka finalizuar operacionin “Fati i lojërave” dhe në një konferencë të përbashkët me Prokurorinë ka dhënë detaje.
Operacioni është zhvilluar në disa qytete si në Tiranë, Durrës, Elbasan, Fier, Berat, Korçë, Lezhë e Shkodër dhe janë vënë në pranga 115 persona, 24 të proceduar dhe 2 janë shpallur në kërkim.
Drejtori i Përgjithshëm i Policisë së Shtetit, Ardi Veliu, tha se ndër të arrestuarit janë edhe disa nga organizatorët kryesorë të kësaj veprimtarie të paligjshme si dhe janë sekuestruar shuma të mëdha parash, kompjuterë të lojërave të fatit, armë zjarri, dhjetëra aparate celularë e aksesorë të tjerë që shërbenin për organizimin dhe implementimin e aktivitetit kriminal.
Veliu u shpreh se operacioni u krye në kohën e zhvillimit të ndeshjeve të futbollit të Europa League dhe në të janë përfshinë 1540 forca policore, nga Departamenti i Policisë Kriminale, Departamenti për Sigurinë Publike.
Në Tiranë dhe në qarqe u ushtruan 486 kontrolle në lokale dhe ambiente që dyshohej se zhvillohej kjo veprimtari kriminale. Në Tiranë u arrit të sekuestrohej një sallë qendrore monitorimi, e cila monitoronte aktivitetin që zhvillohej në pikat e tjera që zhvillohej ky aktivitet. Në këtë sallë u gjetën dhe kapën në punë të zezë 6 punonjës, 20 monitorë, 17 DVR dhe administratori i sallës, Gramoz Murataj, i cili është ortak i vëllait të Fatmir Xhafajt, Agron Xhafajt. Po ashtu u gjetën dhe u sekuestruan 170 milionë lekë të vjetra, të grumbulluara nga bastet që ishin vendosur nëpër pikat e monitoruara prej kësaj qendre kriminale.
Ndërkohë, janë arrestuar edhe menaxherët e grumbullimit dhe transportimit të lekëve nga pikat, konkretisht shtetasit Ervin Frashëri, Isuf Tato, Igli Oboni, Denis Hysko dhe Erdian Myftari, menaxherë të pikave në Tiranë dhe A. N., menaxher në Durrës.
Mes të arrestuarve është edhe Elvis Mulaj, vëllai i Natasha Mulajt, kryetares së Kolegjit të Posaçëm të Apelimit.
Në Tiranë janë arrestuar 84 administratorë dhe menaxherë të lokaleve ku organizonin lojërat e fatit që kishin vënë në dispozicion të ambienteve për zhvillimin e këtij aktiviteti të paligjshëm.
Në Korçë janë arrestuar 9 persona dhe 7 janë proceduar në gjendje të lirë, si dhe janë sekuestruar 1 milion lekë të vjetra.
Në Elbasan janë arrestuar 7 persona dhe 1 është shpallur në kërkim.
Në Durrës janë arrestuar 5 persona dhe 2 janë proceduar në gjendje të lirë.
Në Berat janë arrestuar 4 persona, 6 janë proceduar në gjendje të lirë dhe 1 është shpallur në kërkim.
Në Fier janë arrestuar 3 persona dhe 3 janë proceduar në gjendje të lirë.
Në Shkodër janë arrestuar 3 persona, 3 janë proceduar në gjendje të lirë, si dhe janë sekuestruar 1 milionë lekë të vjetra.
Në Lezhë janë proceduar në gjendje të lirë 3 persona.
Ndërkohë, mësohet se administratorët kishin faqe ëeb-i, të cilat mundësonin vendosjen e skedinave online. Po ashtu bëhet e ditur se administratori krijonte account-e me username dhe password, të cilat ua jepte klientëve të cilët iu mundësohej hyrja në faqe dhe vendosja e skedinave online, ndërkohë që dhe pagesat bëheshin online.
Një administrator kishte të lidhur edhe disa agjentë, të cilët krijonin llogaritë e tyre në celular dhe kështu mundësonin vendosjen e skedinave. Gjatë hetimit u gjurmuan IP-të e kompjuterëve dhe të celularëve që ushtronin këtë aktivitet. Serveri kryesor ishte në Tiranë e më pas iu jepte akses pikave të ndryshme në qytetet e tjera.
Në total janë arrestuar 115 shtetas, janë proceduar në gjendje të lirë 24 dhe 2 janë shpallur në kërkim, si dhe janë sekuestruar në total 172 milionë lekë të vjetra, 40 kompjuterë, 60 DVR, 245 aparate celular, një numër i konsiderueshëm televizor plazma, blloqe shënimesh që shërbejnë për vendosjen e basteve, kasa fiskale, një armë zjarri pistoletë.
Prej 1 Janarit 2019 në Shqipëri ka hyrë në fuqi ligji që ndalon lojrat e fatit. Në nenin 197 parashikohet se organizimi i lojërave të fatit, lotarive apo bixhozit në kundërshtim me ligjin dënohet me burgim nga një deri në tre vjet. Nëse në lojë angazhohen fëmijë nën 18 vjeç, organizatorët dënohen nga 2 deri në pesë vjet burgim. Madje, nëse në bixhoz përfshihen duke shfrytëzuar detyrën edhe punonjësit shtetërorë, burgimi shtohet me një të katërtën. Çdo pjesëmarrës në lojëra të fatit propozohet të dënohet me gjobë deri në një vit burgim thuhet në draft.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.