Botuesi, analisti dhe pronari i Universitetit Europian të Tiranës, Henri Çili është arrestuar nga policia për 6 akuza si “Fshehja e të ardhurave”, “Pastrimi i produkteve të veprës penale ose veprimtarisë kriminale”, “Falsifikimi i dokumenteve”, “Mashtrimit”, “Ushtrimi i ndikimit të paligjshëm ndaj personave që ushtrojnë funksione publike” dhe “Falsifikimi dokumenteve” në bashkëpunim.
Ai u ndalua mbrëmjen e 27 shkurtit dhe shefi i policisë, Ardi Veliu doli enkas në një konferencë për mediat ku dha detaje për operacionin e zhvilluar.
Veliu tha se operacioni është zhvilluar në disa qarqe si Gjirokastër, Tiranë, Durrës, Fier, Shkodër dhe se vjen pas një hetimi 6-mujor nga Prokuroria e Përmetit. Aksioni i policisë mori shtysë nga përgjimet për të arrestuar disa të dyshuar për trafik kanabisi, dhe çoi në pranga botuesin dhe pronarin e UET-së, Henri Çili dhe 27 persona të tjerë deri më tani.
Prokuroria i kishte përgjuar për 6 muaj. Adil Aliko, i arrestuar sot, komunikonte në telefon me Henri Çilin dhe pedagogun dhe juristin e UET, Ilir Korbi, në përpjekje për t'i ndryshuar dënimin me burg dy djemve të tij, Arbion Aliko dënuar përjetë për vrasjen e efektivit të RENEA-s, Ibrahim Basha dhe Albanit dënuar me 17 vite e 6 muaj.
Këto ndërhyrje te gjyqtarët dyshohet se janë bërë në këmbim të një sipërfaqeje toke në Gjirokastër dhe një shumë parash, që Adil Aliko ia ka dhuruar Çilit për ndihmën ndaj djemve.
Edhe Ilir Korbi, juristi i Universitetit Europian të Tiranës, u vu në pranga për veprat penale “Pastrimi i produkteve të veprës penale ose veprimtarisë kriminale”, “Falsifikimi i dokumenteve”, “Mashtrimi”, “Ushtrimi i ndikimit të paligjshëm ndaj personave që ushtrojnë funksione publike” dhe “Falsifikimi dokumenteve” në bashkëpunim.
Bashkëpunëtor tjetër ishte dhe biznesmeni Seit Fishta, 60 vjeç, banues në Tiranë, aktualisht me masë sigurie “Arrest në burg”, i dyshuar për veprat penale për veprat penale “Fshehja e të ardhurave”, “Pastrimi i produkteve të veprës penale ose veprimtarisë kriminale”, “Falsifikimi i dokumenteve” dhe “Mashtrimi”.
Bashkë me Henri Çilin, Ilir Korbin dhe Seit Fishtën, janë vënë në pranga edhe shtetasja Sh. Gj, 56 vjeçe, banuese në Tiranë, e dyshuar për veprën penale “Falsifikimi i dokumenteve”;
B. F., 57 vjeç, banues në Shkodër, i dyshuar për veprat penale “Fshehja e të ardhurave”, “Pastrimi i produkteve të veprës penale ose veprimtarisë kriminale”, “Falsifikimi i dokumenteve” dhe “Mashtrimi”;
E. (G.) A., 34 vjeç, banues në Tiranë, i dyshuar për veprat penale “Pastrimi i produkteve të veprës penale ose veprimtarisë kriminale” “Mashtrimi”, “Prodhimi dhe shitja e narkotikeve” dhe “Armëmbajtja pa leje”.
L. J., 56 vjeç, banues në Patos, i dyshuar për veprat penale “Falsifikim te dokumenteve” dhe “Mashtrimi”.
Janë edhe 21 shtetas të tjerë të arrestuar, mbi të cilët rëndojnë akuzat për vepra penale si “prodhim dhe shitje të lëndëve narkotike” dhe “Mbajta pa leje e armëve luftarake dhe municioneve”.
Gjithashtu, në kuadër të këtij operacioni janë shpallur në kërkim 6 persona dhe ka nisur procedimi penal në gjendje të lirë për 12 shtetas të tjerë, për vepra të ndryshme penale që kanë lidhje me procedimin.
Ndërkohë nga kontrolli i 61 banesave, 10 ambienteve Njësi Shërbimi, dhe 33 automjeteve janë sekuestruar 3 pushkë automatike me silenciator, 2 automatik kallashnikov, 8 kallëpe lende plasëse tritol, 620 fishekë, 2 granata difensive, 71 krehër fishekësh, 13 automjete te markave te ndryshme, 40 telefona celular, dokumente noteriale, kontrata, certifikata pronësie të ndryshme dhe një sasi lënde narkotike cannabis sativa.
Policia tha në se në këtë operacion u angazhuan 15 grupe të reparteve të FNSH Shkodër Fier e Tiranë, Forca e Posacme Operacionle në Policisë e Shtetit dhe shërbimet e DVP Gjirokastër, Tiranë, Durrës, Elbasan, Fier e Shkodër.
Ministri Lleshaj: Operacioni, provë e seriozitetit në luftën e përbashkët kundër krimit të organizuar
Pas megaoperacionit të policisë, shtrirë në disa qarqe të vendit, me 28 të arrestuar dhe 6 në kërkim, ka reaguar edhe ministri i Brendshëm, Sandër Lleshaj.
Lleshaj përgëzon policinë dhe prokurorinë për punën e bërë dhe thekson se kjo ishte “një tjetër provë e rëndësishme e seriozitetit në luftën e përbashkët kundër krimit të organizuar”.
“Policia dhe Prokuroria dhanë sot një tjetër provë të rëndësishme të seriozitetit në luftën e përbashkët kundër krimit të organizuar. Reforma në Drejtësi po sjell përditë rezultate. Droga dhe krimi nuk mund të kenë vend tek ne. Përgëzime për punën e Policisë dhe Prokurorisë”, shkruan ministri Lleshaj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.