.png)
Mosdevijimi nga marrëveshja e 5 qershorit dhe nisma e mazhorancës për të rregulluar me ligj kompetencat e Presidentit u konsideruan nga Ilir Meta si vijat e kuqe që ndajnë vendimin e tij për shpërndarjen ose jo të Parlamentit.
Presidenti tha se çdo përpjekje për të devijuar nga marrëveshja e 5 qershorit mes mazhorancës dhe opozitës do të konsiderohet prej tij si tentativë për grusht shtetit, që do të marrë përgjigjen e grushtit të popullit.
“Ftoj aktorët politikë t’i qëndrojnë marrëveshjes së 5 qershorit, të mos devijojnë asnjë milimetër nga ajo marrëveshje, të mos përdorin gjasmë hapjen e listave për të prishur atë marrëveshje. Përshëndes qëndrimin e opozitës për të hapur 100 për qind listat. Nëse mazhoranca nuk dëshiron që të hapë listat për vete, le t’i mbajë të mbyllura, por nuk ka përse të pengojë partitë e tjera. Nëse ka shkelje të njëanshme të asaj marrëveshjeje, siç u bë me ndryshimet kushtetuese, kemi tentativë për grusht shteti dhe kuptohet që grushti i shtetit do të shtypet nga grushti i popullit”, u shpreh Meta.
“Asnjë i sëmurë mendor apo i marrosur pas pushtetit të pamerituar dhe të vjedhur nuk duhet t’i shkojë mendja se presidenti i këtij vendi mund të frikësohet, mund të intimidohet dhe dekurajohet që të përmbushë misionin e tij historik, që të jetë Presidenti i 25 prillit, nëse këtij parlamenti s’i mjaftojnë të gjitha rekordet negative që ka si parlamenti më me probleme, do të ngelet si parlamenti i 1 prillit nëse nuk reflekton. respektimi pikë për pikë i marrëveshjes së 5 qershorit nga e cila përshëndes opozitën që ka mbështetur hapjen e listave 100 për qind”, vijoi ai.
Meta tha se “kupa është derdhur me kohë”. “Nuk do të ketë lojëra. Nuk do të ketë më as marrëveshje kundër zgjedhjeve. Është vetëm marrëveshja e 5 qershorit dhe e vetmja gjë që i shtohet është listat e hapura për të gjithë”, theksoi Presidenti.
Nismën e mazhorancës për t’i rregulluar me ligj kompetencat e vlerësoi si antikushtetuese dhe në shpërthim e sipër akuzoi socialistët se kanë shpenzuar miliarda lek për lobime në Venecia në përpjekje për të mposhtur Presidentin, por nuk ja dolën dot. Meta sfidoi shumicën që të vazhdojë përpara me këtë ligj, duke nënkuptuar se kjo përkthehej automatikisht në shpërndarje të Parlamentit pa pritur 25 prillin.
“Nuk ka ligj antikushtetues nga një Parlament jokushtetues që e pengon Presidentin të përmbushë misionin kryesor në mbrojtje të Kushtetutës dhe të zgjedhjeve të lira dhe të ndershme. Mazhoranca e ka provuar me Presidentin. 3 me 0 në Venecia, pavarësisht nga lobimet dhe miliardat që ka shpenzuar lartë e poshtë. Ky është Presidenti i 2 marsit. Populli i 2 marsit është po aty dhe është shtuar madje dhe vazhdojnë kërkojnë shpërndarjen. Unë them që të shkojmë më 25 prill. Nëse këta duan shpërndarjen, le ta provojnë. Le ta provojnë se kush shkarkon njëri-tjetrin. Presidenti ka respektuar dhe do të respektojë Kushtetutën”, tha ai.
Presidenti përjashtoi mundësinë e dorëheqjes dhe largimit nga posti.
“Për këtë institucion duhet të jemi të qetë deri më 24 korrik 2022. Presidenti e ka mbrojtur kushtetutën në mënyrë të vendosur dhe ka bërë gjithçka që vendi të mos përplaset në fund të greminës, edhe pse e ka marrë tatëpjetën prej kohësh”, shtoi ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
