.png)
Ambasadorja amerikane në Tiranë njohu përpjekjet e autoritetet shqiptare në luftën kundër korrupsionit, por duke folur në konferencën e prezantimit të raportit të GRECO-s për antikorrupsioni, Yuri Kim tha se vendi përballet ende me një mal me probleme.
Duke e lidhur fjalën e saj me situatën e pandemisë, Kim tha se ndonjëherë korrupsioni mund të jetë vdekjeprurës. Kim foli që nga korrupsioni më i rëndomtë në zyrat e shtetit, deri tek format më të ndërlikuara të tij me tenderat.
“Në lidhje me korrupsioni ka një mal me probleme në Shqipëri dhe përpjekjet e bëra pas reformës në drejtësi nuk duhen marrë si deklarata fitoreje. Pavarësisht nëse janë prokurime mashtruese, ose të fryra, apo roje në kufi të cilët marrin rryshfet për të lejuar njerëzit që të kalojnë kufirin që më pas përhapin infeksionin, rreziku është real. Qeveritë mund të kufizojnë mundësitë për korrupsion dhe të dënojnë ata që përdorin postin e tyre publik për të pasuruar veten, apo partinë e tyre. Qeveria duhet të tregojë që është në kahun e njerëzve”, u shpreh Kim.
Kryediplomatja amerikane tha se SHBA do të vazhdojë të mbështesë Shqipërinë në përpjekjet e saj për të çrrënjosur korrupsionin, por kërkoi nga Qeveria që të tregojë më shumë vullnet për t’u anuar nga ana e qytetarëve.
“Një nga mënyrat për të çrrënjosur korrupsionin është të punosh në emër të qytetarëve dhe jo në emër të interesave të ngushta. Qytetarët kanë nevojë që paratë e tyre të investohen për përmirësimin e jetës së tyre. Të gjitha qeveritë vuajnë nga një nivel korrupsioni, por qeveritë mund të dënojnë ata që bëjnë korrupsion. Policia, prokurorët dhe gjyqtarët e pavarur janë thelbësorë për një qeverisje të mirë. Do të ketë gjithmonë aktorë të këqinj, por qeveritë duhet t’i dënojnë duke treguar që qeveria është në krahun e njerëzve”, tha ambasadorja.
Edhe Kryeministri Edi Rama i mëshoi reformës në drejtësi si mekanizmi që do të luftojë korrupsionin.
“Deri para nisjes së reformës në drejtësi, lufta kundër korrupsionit ka qenë një luftë me mullinjtë e erës. Fillimi dhe vazhdimi i kësaj reforme janë baza për të pasur nesër një shtet modern, funksional dhe institucione që janë më të forta sesa tundimi i korrupsionit. Shqipëria është ende në një proces rritjeje dhe shtetndërtimi dhe 30 vite janë shumë për jetën e një njeriu, por jo për shtetndërtimin, duke pasur parasysh se nga e nisëm”, u shpreh ai.
Por, Rama e cilësoi të gabuar perceptimin se koka e korrupsionit në Shqipëri janë politikanët.
“Koka e korrupsionit në Shqipëri nuk janë politikanët. Nuk kanë qenë politikanët, pavarësisht se kanë qenë pjesë. Koka ka qenë gjykatësit dhe prokurorët që kanë garantuar pandëshkueshmërinë në këtë sistem. Po të mos kishin qenë këta, nuk do të kishin qenë as korrupsioni spektakolar dhe nganjëherë edhe vrastar i politikanëve. Nëse nuk vendoset në themel të drejtësisë kurbani i korrupsionit 30-vjeçar, që është fiks tek korporata që vettingu po e shpërbën, por nuk mjafton, atëherë ngrehina nuk do të qëndrojë dhe historia do të përsëritet dhe do të përsëritet keq”, tha Rama.
Kryeministri shtoi se përtej betejës së drejtësisë me korrupsionin, Qeveria vetë ka ndërmarrë hapa të qenësishëm, duke përmendur këtu reformat e ndërmarra në fushën e ofrimit të shërbimeve përmes e-Albanias, atë të punësimit të mësuesve, apo të konkurrimit në universitete.
Në fund, Rama sulmoi raportet e institucioneve, apo organizatave ndërkombëtare të këtij viti, ku është folur për përkeqësim, apo qëndrim në vendnumëro të Shqipërisë sa i përket klasifikimit në renditjen për korrupsionin.
“Janë publikime denigruese për vende të caktuara. korruptimi i fakteve dhe të së vërtetës është një sëmundje që duhet ta luftojmë bashkarisht vazhdimisht. ju keni qenë shumë të ndjeshëm për ligjin për shpifjen, madje të gjithë”, u shpreh ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
