Autoritetet greke lirojnë nga burgu biznesmenin shqiptar, Edmond Bego, ish i dënuar për trafik droge, i akuzuar nga Italia për pjesëmarrje në organizatë kriminale.
Ai u arrestua pak ditë më parë teksa kthehej nga pushimet në Korfuz, për llogari të shtetit italian.
Lirimi i tij erdhi pas një përgjigjeje të kthyer nga pala italiane. Interpol Roma ka konfirmuar se Edmond Bego nuk ka çështje të hapur në Itali.
Çështja e biznesmenit shqiptar trazoi ditët e fundit jo pak edhe politikën shqiptare.
Opozita akuzoi deputetin socialist Taulant Balla si partner biznesi me të. Balla i pranoi njohjet familjare me të, por u shpreh se nuk i është ofruar mburojë politike.
Edmond Bego, pronar i disa bizneseve në Shqipëri u ndalua në Greqi më 18 gusht.
Ai mbahej në paraburgim në Korfuz, që nga momenti i ndalimit, ndërkohë që kishte deklaruar gjatë arrestimit se i kishte shlyer detyrimet e tij dhe se po e akuzonin padrejtësisht.
Pas lirimit të biznesmenit nga autoritetet greke, ka folur edhe avokati i tij, Ardian Leka.
Sipas Lekës, ndalimi i Begos ka qenë një gabim i autoriteteve greke në doganë ashtu siç ndodh me çdo shtetas shqiptar që kalon kufirin.
“Edmond Bego ka dalë nga burgu dhe tani po bën tërheqjen e sendeve personale në komisariatin e policisë. Kjo situatë u krijua për efektet e gabimeve të sistemeve greke. Kjo nuk është një situatë e re. Autoritetet greke u nxjerrin shpeshherë shtetasve shqiptarë. Çdo ditë në kufi krijohen radha kilometrike për shkak të problemeve që iu nxjerrin edhe personave pa precendentë. Megjithatë situata u qartësua nga autoritetet italiane”, tha Leka.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.