Një seancë e qetë parlamentare ishte ajo e së hënës, ku deputetët më tepër u fokusuan në fjalimet e tyre në përshendetjet për 12-vjetorin e Pavarësisë së Kosovës dhe te mbledhja e donatorëve në Bruksel. Shkaku i kësaj qetësie duket se ishte fakti se në sallë mungonte kryeministri Edi Rama dhe një pjesë e ministrave, si dhe rendi i ditës nuk kishte çështje të nxehta politike.
Çështja që pati më shumë “debate” ishte ligji i paraqitur nga deputeti i PS-së, Ilir Beqaj, i cili propozon që në Shqipëri pas dy vitesh të shiten paketa të cilësuara “Pictorials”, me fotot paralajmëruese për dëmet që shkaktohen nga duhani. Gjithashtu firmat do të shesin nga maji i 2022 paketa duke i hequr markën; e për këtë ka filluar që të zbatohet edhe paketimi i thjeshtë, (plain packaging) i cili quhet ndryshe eclhe paketim standard, neutral, gjenerik apo homogjen.
Gjatë diskutimeve të tyre deputetët e mazhorancës dhe opozitës shprehën skepticizmin e tyre se kjo do të sjellë një ulje të përdoruesve të duhanit. Deputetja e opozitës, Rudina Hajdari kërkoi që kjo nismë të mos votohet dhe të rishikohet, pasi nuk do të ketë asnjë ndikim.
Deputetët Kujtim Gjuzi dhe Besnik Baraj në diskutimet e tyre u shprehën se ndonëse kërkohet zbatimi i ligjit të duhanit, janë vetë deputetët dhe administrata që lejojnë të tymosin në ambientet e administratës. “Deputeti Beqaj ka arritur të punojë mirë jashtë Parlamentit për ligjin e duhanit, por këtu nuk ia ka arritur, pasi ligji shkelet në ambientet e Kuvendit”, u shpreh socialisti Bare.
Duke folur në emër të grupit të PS-së, Bare u shpreh se nuk do të ketë ndonjë vlerë miratimi i këtij projektligji. “Edhe pse jam dakord në parim me ligjin, dyshoj në praktikën e zbatimit të tij. Ajo që unë doja t’i jepja prioritet, janë masat edukative, sensibilizuese, veçanërisht rolin e shkollës sonë dhe të medias në drejtimin e shkurajimit të përdorimit të duhanit. Që në shkollën fillore duhet të jetë pjesë e mësimdhënies, në mënyrë që realisht të bëjmë të ndërgjegjshëm brezin e ri, që duhani vret”, tha ai.
Projektligji në fjalë u rrëzua me 75 vota kundër 8 vota pro dhe 7 abstenim. Këtu siç duket ka ndikuar edhe fjala e ministres së Shëndetësisë Ogerta Manastirliu, e cila bëri të ditur se në shkurt do të nxjerrin aktet normative për ligjin kundër duhanit. Në momentin e votimit, kryetari i grupit parlamentar të PS-së, Taulant Balla kërkoi rrëzimin e nismës së deputetit socialist, Ilir Beqaj.
Më pas në rendin e ditës u votua edhe ligji për “Për produktet plehëruese”. Në emër të grupit parlamentar të Partisë Socialiste, për këtë projektligj foli Ardit Konomi i cili tha se: “Qëllimi i këtij projektligji është garantimi i shëndetit të njerëzve pikësëpari dhe të kafshëve, si dhe mbrojtja e mjedisit nga përdorimi i produkteve plehërues, rritja e efikasitetit në të ushqyerit e bimëve me elemente ushqyese, si dhe përmirësimi i cilësive fiziko-kimike dhe të pjellorisë së tokës. Objektivi që synohet të arrihet është përcaktimi i rregullave për prodhimin, regjistrimin, tregtimin, përdorimin, kontrollin e cilësisë, gjurmueshmërinë, informimin, reklamimin dhe inspektimin e veprimtarive që lidhen me produktet plehëruese si dhe organizimin e funksionimin e strukturave përkatëse”. Projektligji në fjalë u miratua me 81 vota pro 10 kundër dhe 3 abstenim.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.