.png)
Një botim i parë i një libri Harry Potter, i blerë nga një bibliotekë për vetëm disa cent, është shitur në ankand për 10,500 £, ose më shumë se 12,000 euro.
Pjesa e parë e serisë, “Harry Potter dhe Guri Filozofal”, është një nga 500 veprat që doli në ankand pas vdekjes së koleksionistit nga qyteti anglez Staffordshire në fillim të këtij viti.
Sipas drejtuesit të ankandit Richard Winterton, çmimin më të lartë për librin e ka ofruar një blerës online nga Los Anxhelosi.
“Ne jemi plotësisht të kënaqur me rezultatin”, tha ai.
Kjo kopje e “Harry Potter and the Philosopher’s Stone”, botuar në 1997, është një nga 300 kopjet e dërguara në biblioteka dhe është blerë nga Biblioteka Wolverhampton nga një burrë që jetonte në Barntwood.
Libri ka ende identifikimin e bibliotekës, afishen me shkronjën “J”, vulën e tërheqjes dhe çmimin e shitjes “30 pens”, ose rreth gjysmë euro.
Pronari i librit vdiq papritur në moshën 55-vjeçare dhe ai u gjet nga ekipi i shtëpisë së ankandeve të Richard Winterton.
Autorja britanike, J. K. Rowling, mbaroi së shkruari romanin e saj të parë Harry Potter, i cili u refuzua nga shtëpi botuese të shumta para se të botohej nga Bloomsbury i atëhershëm pak i njohur gati 20 vjet më parë.
Shkrimtarja përdori pseudonimin J. K Rowling sepse shanset për shitje ishin më të mëdha nëse autorja e librit mendohej të ishte një burrë.
Tani romanet e Harry Potter, të refuzuara dhe të nënvlerësuara nga botues të shumtë, janë bërë një fenomen letrar që ende nuk ka të ngjashëm në botë.
Ndërkohë, një tjetër serial televiziv “Harry Potter” pritet të vijë. Seriali i ardhshëm premton t’i qëndrojë besnike botës magjike me të cilën fansat ranë në dashuri.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
