.png)
Santos-Palmeiras, një finale e gjitha braziliane në Kupën Libertadores. Pas 0-0 në ndeshjen e pare gjysmëfinale, në fushën e Boka Zhunior, Santosi ka fituar 3-0 në shtëpi ndaj argjentinasve dhe ka siguruar finalen. Golat u shënuan nga Pituka (16’), Soteldo (49’) dhe Braga (51’).
Tevez me shokë mbeten jashtë finales së 30 janarit, ku fituesi ka të drejtën të marrë pjesë në Botërorin e Klubeve në shkurt. Një sfidë mes dy klubeve të mëdha braziliane, e 61-ta në këtë kompeticion, që do luhet në “Maracanà”.
Santosi nuk pati mëshirë ndaj Bokës, duke e çmontuar kundërshtarin pa shumë vështirësi. Marinjo goditi shtyllën vetëm pas 45 sekondash, ndërsa në minutën e 16-të Pituka goditi saktë me të majtën, rrafsh me tokën. Boka e pati shumë të vështirë të reagonte. Me fillimin e pjesës së dytë, të zotët e shtëpisë u dhanë fund shpresave të argjentinasve, duke shënuar 2 gola me Soteldo dhe Braga.
Gjithçka u bë edhe më e lehtë për Santosin, pasi Fabra u ndëshkua me karton të kuq dhe e la Bokën me 10 vetë për më shumë se gjymë ore. Ndeshja nuk kishte më histori. Përpjekjet e Tevezit për të shënuar golin e nderit nuk dhanë rezultat, ndërsa brazilianët humbën disa raste për golin e katërt.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
