Partia Demokratike vijon denoncimet ndaj kryeministrit Edi Rama si përgjegjësi kryesor për zgjedhjen e njerëzve të inkriminuar në krye të bashkive. Sekretari i Përgjithshëm i PD-së, Gazment Bardhi publikon një video ku Rama në një emision televiziv shprehet se “mezi e pres ligjin, që ata e quajnë “Dekriminalizimin”, kam pritur që të hyjë se më shpejt në fuqi dhe të shohim se kush janë këtë kriminelë të shumëpërfolur”.
“Edi Rama është përgjegjës kryesor për përfshirjen e krimit në politikë. 5 kryebashkiakët e rinj ilegjitimë, trafikantë droge, hajdutë, falsifikatorë, dhunues apo vrasës janë vetëm maja e ajsbergut të lidhjeve të Edi Ramës me botën e errët të krimit, tek e cila bazoi karrierën politike dhe po mban pushtetin. Ndarja e politikës nga krimi nis me largimin e Edi Ramës”, shprehet Bardhi.
Më pas PD rendit pesë kryebashkiakët që sipas janë qenë të dënuar më parë dhe që e kishin fshehur në formularin e Dekriminalizimit. Ata janë që të gjithë zgjedhurit në zgjedhjet e 30 qershorit: Valdrin Pjetri i Shkodrës, Mark Babani i Vaut të Dejës, Agim Kajmaku i Vorës, Qerima Ismailaj i Mallakastrës dhe Agron Malaj i Matit.
Pjetri, Kajmaku janë dy kryebashkiakët që në hetim nga prokuroria për fshehje të deklarimit të dënimeve të tyre, duke iu hequr edhe mandati i fituar në zgjedhjet e fundit lokale. Për Babanin ende nuk ka ndonjë vendim nga prokuroria, ndërsa për Ismailajn prokuroria kë kërkuar marrjen e shenjave të gishtave, pas denoncimit të bërë nga PD-ja.
Kryebashkiaku i Matit, Agron Malaj është kryebashkiaku i fundit i nxjerrë nga partia më e madhe e opozitës. Po kush e ka radhën sipas PD-së? Në videon e publikuar nga Bardhi, harta e Shqipërisë, ngjyroset edhe me disa bashki të tjera. Ndoshta mund të shihet si një ndonjë provokim apo sinjal i PD-së, por Tropoja, Elbasani, Gjirokastër, Sarandë, Dibër, Kukës, Fier, Skrapar, Vlorë e Korçë janë ngjyros nga PD-ja.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.