.png)
As qëndrimi publik i Kancelares gjermane, Angela Merkel nga Tirana, që tha se Ballkani i Hapur nuk konkurron Procesin e Berlinit përkundrazi e përshpejton atë, nuk ka bindur Albin Kurtin që të ndryshojë mendim për këtë temë.
Kryeministri i Kosovës foli për mediat pas takimit që pati me Merkel dhe kryeministrat e tjerë të rajonit në Tirana Business Park në Rinas.
“Procesi i Berlinit është i nevojshëm dhe i mjaftueshëm për rrugëtimin europian dhe nuk ka nevojë për variante të tjera”, u shpreh Albin Kurti.
Ai thotë se pjesëmarrja te kjo nismë do të thotë shprehje mirëkuptimi ndaj Serbisë për vendimin e saj për të mos njohur Kosovën.
“Republika e Kosovës është një shtet i pavarur për të cilën të gjithë ne duhet të angazhohemi pavarësisht pozitës që kemi dhe të kërkojmë njohjen e saj dhe jo të shprehim mirëkuptim ndaj Serbisë për mos njohjen e Kosovës. Cfardo mirëkuptimi ndaj Serbisë për mos njohje i kushton Kosovës. Iniciativat rajonale nuk duhet të bëhen pa BE-në brenda. Dallimi mes Procesit të Berlinit dhe Ballkanit të Hapur është se në të dytën nuk e kemi BE-në”, tha Kurti.
Kryeministri i Kosovës komentoi edhe deklaratat e Kryeministrit Edi Rama, që në konferencën për shtyp me Angela Merkel u shpreh se Kosova po refuzon pjesëmarrjen te Ballkani i Hapur duke nxjerrë teori konspirative, ndërsa e cilësoi nismën si një mundësi të shkëlqyer që duhet shfrytëzuar nga Prishtina.
“Unë nuk e di për çfarë tetori konspiracioni është fjala këtu. Është dashur ta pyesni atë. Unë nuk e di për çfarë teorie bëhet fjalë. Unë po jua tregoj qëndrimin tim, që e thashë edhe aty; Procesi i Berlinit është i nevojshëm dhe i mjaftueshëm për rrugëtimin europian dhe nuk ka nevojë për variante të tjera”, tha ai.
Kurti sqaroi se gjërat që e bashkojnë me Edi Ramën janë shumë, por “Ballkani i Hapur” nuk është mes tyre. Ai tha se sapo të formohet qeveria e re në Tiranë, do të ketë takime dhe mbledhje të përbashkëta.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
