Nga Gazeta ‘Si’- Në takimin bilateral që u zhvillua në Bruksel mes kryeministrit të Kosovës Albin Kurti dhe presidentit serb Aleksander Vuçiç nuk u arrit asnjë kompromis.
Pas përfundimit të takimit që zgjati rreth dy orë, Vuçiç tha për gazetarët se Kurti i shmanget themelimit të Asociacionit të komunave me shumicë serbe dhe bisedimet rezultuan pa sukses pasi Kurti, sipas tij, "e refuzoi propozimin europian".
‘I shqetësuar për pozitën e serbëve në Kosovë’
Ai shtoi se në takim u diskutua edhe për mundësinë e mbajtjes së zgjedhjeve të reja në veri të Kosovës, zonë e banuar me shumicë serbe.
“Nëse kryetarët shqiptarë të komunave atje japin dorëheqje, unë do të jap gjithçka nga vetja që komuniteti serb të marrë pjesë në procesin e ri zgjedhor”, tha Vuçiç ndërsa shtoi se nuk mund të japë premtime në emër të tij.
Mandej ai u shpreh se ishte i shqetësuar pas atyre që kishte dëgjuar sot.
"Para së gjithash, jam i shqetësuar. Jam i kënaqur që Serbia ka treguar konstruktivitetin e saj, përgjegjësinë dhe vullnetin për t'iu qasur zgjidhjeve të kompromisit por jam i shqetësuar për pozitën e popullit serb në Kosovë, pas gjithçkaje që pashë dhe dëgjova sot", tha Vuçiç i cili nuk specifikoi më shumë ndërsa shtoi se pret reagimin e BE-së.
Takimi mes tyre erdhi pas takimeve të ndara që ata zhvilluan me ndërmjetësuesit e procesit, shefin e politikës së jashtme të Bashkimit Evropian, Josep Borrell, dhe të dërguarin e BE-së për dialogun Kosovë-Serbi, Mirosllav Lajçak.
Në fotot e publikuara gjatë tryezës së përbashkët u vu re se ndryshe nga takimi i dy majit ku ata u pritën “me drekë” , në një tavolinë të mbushur me hamburgerë të shoqëruar me coca-cola, kësaj here tryeza dukej më e ftohtë, me vetëm disa shishe qelqi uji.
Dy udhëheqësit u takuan të enjten në Bruksel - për herë të parë pas më shumë se katër muajsh - në kuadër të dialogut për normalizimin e marrëdhënieve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.