.png)
Për më shumë se një shekull, njerëzit në mbarë botën kanë festuar Ditën Ndërkombëtare të Gruas më 8 Mars, shkruan BBC.
Si lindi Dita Ndërkombëtare e Gruas?
‘’Dita Ndërkombëtare e Gruas’’ (IWD) lindi nga lëvizja punëtore. Hapat e parë të të drejtave të grave datojnë që prej vitit 1908, kur 15 000 gra marshuan në qytetin e Nju Jorkut duke kërkuar ‘’orë më të shkurtra pune, paga më të mira dhe të drejtën e votës’’.
Ideja për ta bërë atë një ngjarje ndërkombëtare erdhi nga Clara Zetkin, një aktiviste komuniste dhe mbështetëse e të drejtave të grave.
Në vitin 1910 ajo e ngriti kauzën në Konferencën Ndërkombëtare të Grave Punëtore në Kopenhagë, ku kauza e saj u mbështet njëzëri nga 100 gra nga 17 vende që merrnin pjesë në konferencë.
Dita e parë ndërkombëtare e gruas u festua në vitin 1911, në Austri, Danimarkë, Gjermani dhe Zvicër.
Kombet e Bashkuara (OKB) filluan të festojnë ngjarjen në vitin 1975. Tema e parë e miratuar nga Kombet e Bashkuara (në vitin 1996) ishte “Festoni të kaluarën, planifikoni për të ardhmen”.
Pse festohet Dita Ndërkombëtare e Gruas më 8 Mars?
Ideja origjinale e zonjës Zetkin për një festë ndërkombëtare nuk ishte e lidhur me një ditë të caktuar. Data e 8 Marsit u zgjodh pasi gratë ruse bënë thirrje për “bukë dhe paqe” gjatë një greve gjatë luftës në 1917.
Katër ditë pas grevës, Cari rus u detyrua të abdikonte dhe qeveria e përkohshme u dha grave të drejtën e votës. Sipas kalendarit Julian që atëherë përdorej në Rusi, greva e grave filloi më 23 shkurt.
Në kalendarin Gregorian të përdorur në pjesën më të madhe të botës, kjo datë është 8 Marsi.
Si festohet Dita Ndërkombëtare e Gruas në mbarë botën?
Dita Ndërkombëtare e Gruas është një festë kombëtare në shumë vende. Në Kinë, shumë grave u jepet një gjysmë dite pushimi, siç rekomandohet nga Këshilli i Shtetit.
Mijëra ngjarje zhvillohen në mbarë botën, duke përfshirë marshime, konferenca, koncerte, ekspozita dhe debate.
Në Itali, IWD quhet Dita e Gruas dhe lulet e mimozës janë një dhuratë popullore. Shitjet e luleve në Rusi zakonisht dyfishohen rreth Ditës Ndërkombëtare të Gruas.
Në SHBA, marsi është ‘’Muaji i Historisë së Grave’’. Një shpallje presidenciale e lëshuar çdo vit nderon arritjet e grave amerikane.
Pse vishet ngjyra vjollcë në Ditën Ndërkombëtare të Gruas?
Vjollca, jeshile dhe e bardha janë ngjyrat e IWD, sipas faqes së internetit të Ditës Ndërkombëtare të Gruas.
“Vjollca nënkupton drejtësinë dhe dinjitetin. E gjelbërta simbolizon shpresën. E bardha përfaqëson pastërtinë, megjithëse një koncept i diskutueshëm”, thekson IWD.
Pse aktivistët argumentojnë se Dita Ndërkombëtare e Gruas është e rëndësishme?
Organizatorët thonë se dita ofron një mundësi për të theksuar progresin e bërë, por edhe për të theksuar erozionin e të drejtave të grave në mbarë botën, si dhe efektet e dhunës dhe abuzimit me bazë gjinore.
Gjatë 12 muajve të fundit, gratë në Lindjen e Mesme, Afganistan, Iran dhe Ukrainë kanë luftuar për të drejtat e tyre mes luftës dhe dhunës. (ATA)
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
