Pas humbjes 1-2 në fushën e vet, skuadra e Kontes dominon Juventusin në Torino, por nuk arrin të shënojë dhe dështon kështu në një tjetër objektiv sezonal. CR7 me shokë, pas barazimit 0-0, janë finalistët e parë të Kupës së Italisë, ku më 19 maj do të sfidojnë Atalantën ose Napolin. Bardhezinjtë do të luajnë në finale për herë të 20-të.
Juventus-Inter dukej një film i parë, me zikaltrit që dhanë gjithçka në fushë, si në pjesën e dytë të ndeshjes së parë, por u përplasën me murin bardhezi. Diferencën sa i takon kualifikimit e kanë bërë dy gabimet e së martës së shkuar. Pa Bonuçin, Pirlo i kërkoi Bentankurit të qëndronte afër Demiralit dhe De Ligtit. Danilo dhe Aleks Sandro ndihmuan më shumë mesfushën, ndërsa Kuadrado shpesh spostohej në qendër, duke ia lehtësuar punën Darmianit.
Konte i besoi Eriskenit një fanellë titullari. Loja nuk pati ritëm të lartë, me Juventusin që bëri qarkullim horizontal të topit për ta nxjerrë Interin përpara, por kundërshtari nuk u “peshkua”. Zikaltrit ishin gati për të sulmuar shpejt nga e djathta me Hakimin, që u ndal nga mbrojtësit disa herë. Lukaku dhe Lautaro humbën raste për ta zhbllokuar ndeshjen. Belgu këtë herë vuajti ndaj De Ligt, po aq i fortë sa ai, por më i shpejtë. Ronaldo rrezikoi në fundin e pjesës së parë, por De Vrij dhe Handanoviç u treguan të kujdesshëm.
Interi këmnëguli më shumë në pjesën e dytë, por gjeti një Juventus të vendosur mirë prapa. Bunkeri bardhezi mbeti i fortë, ndërsa Pirlo reagoi nga stoli me MekKenin. Dhe amerikani nxorri Ronaldon përpara Handanoviçit, i cili e ndali portugezin. Edhe Konte bëri ndërrimet e tij, por asgjë nuk ndryshoi. Tani Interit i mbetet vetëm kampionati për të shpëtuar sezonin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
