.png)
Nga Gazeta Si - Johnny Depp e goditi vazhdimisht Amber Heard në fytyrë gjatë një debati në apartamentin e çiftit në mars 2015. Motra e aktores tha të mërkurën e kaluar para jurisë së gjykatës në Fairfax, Virxhinia, ku aktorja po mbron padinë për shpifje të ngritur nga ish-bashkëshorti.
Motra e saj, Whitney Henriquez, u thirr për të mbështetur pretendimet e Heard se Depp e kishte sulmuar në mënyrë të përsëritur atë gjatë marrëdhënies së tyre katërvjeçare.
Henriquez, raporton ‘Variety’, përshkroi se kishte parë një përleshje në të cilën Depp dhe Heard bërtisnin me njëri-tjetrin. Depp vrapoi lart në një kat të ndërmjetëm dhe goditi Henriquez në shpinë, është shprehur ajo, dhe më pas Heard e goditi atë me një shuplakë, duke i thënë ‘Mos e godit motrën time’. Më pas, roja i sigurisë së Depp-it vrapoi lart te shkallët.
“Johnny tashmë e kishte kapur Amberin nga flokët me njërën dorë dhe po e godiste vazhdimisht në fytyrë me dorën tjetër, ndërsa unë isha aty”, tha Henriquez. Roja i sigurisë ndau çiftin dhe Henriquez e mori Heardin në banesën e saj dhe mbylli derën. Ndërkohë, nga jashtë ajo ka thënë se dëgjonte Depp duke bërtitur ‘Të urrej! Ju urrej të dyjave’.
Henriquez kishte dëshmuar më parë për përleshjen - e njohur në çështjen gjyqësore të Depp-Heard si ‘incidenti i shkallëve’ - gjatë gjyqit për shpifje në 2020 në Mbretërinë e Bashkuar që përfshinte çiftin. Në atë gjyq, gjykatësi zbuloi se Depp kishte sulmuar Heard në atë rast, si dhe në shumë të tjera.
Depp foli për incidentin në gjyqin e Virxhinias më 20 prill. Në rrëfimin e tij, ai kujton se ka marrë një grusht nga Heard. Jurive iu tregua një foto e fytyrës së tij të mavijosur. Aktori nuk tha se goditi Heardin apo motrën e tij. Travis McGivern, roja i sigurisë, dha dëshmi në përputhje me versionin e ngjarjeve të Depp.
Ish-bashkëshortja e yllit kujtoi gjithashtu në dëshminë e saj se ajo kishte vrapuar kundër Depp për të mbrojtur motrën e saj dhe se ai e kishte mbajtur nga pjesa e pasme e kokës dhe e kishte goditur vazhdimisht në fytyrë.
Henriquez dëshmoi se të nesërmen në mëngjes, ajo dhe Heard zbuluan se gardëroba e gruas ishte boshatisur dhe se varëset e rrobave kishin dalë në shkallë. Ajo tha gjithashtu se gjeti një marrëveshje moszbulimi që i ishte lënë në tryezën e kuzhinës, por, ajo e bëri të qartë, ajo kurrë nuk e nënshkroi atë.
Henriquez dëshmoi një përkeqësim të përgjithshëm të shëndetit të Heard në katër vitet e marrëdhënies së saj me Depp. Ajo shpjegoi se Depp në shumë raste ishte mirë, por ai zemërohej dhe ofendohej sa herë që përdorte drogë ose alkool.
“Kur pinte ai zemërohej shumë”, tha ajo. “Ai ka thënë gjëra vërtet të këqija dhe të vrazhda, zakonisht për Amberin, ndonjëherë për mua”.
Më herët gjatë ditës, anëtarëve të jurisë iu shfaqën regjistrimet në video të Raquel Pennington dhe Joshua Dreë, një çift që ishin miq me Heard dhe që jetonin për një kohë në një apartament ngjitur. Pennington kishte bërë një seri fotosh që tregonin mavijosje në fytyrën e Heard dhe tha se ajo kishte frikë për shoqen e saj.
“Unë isha i shqetësuar për sigurinë e saj, se Depp mund të bënte aksidentalisht diçka më të keqe”, është shprehur Pennington.
Grimierja e Amber Heard dëshmoi se ajo mbuloi mavijosjet në fytyrën e gruas së atëhershme të Johnny Depp përpara një daljeje të aktores në TV në dhjetor 2015. Përveç mavijosjeve në fytyrë, kishte një buzë të çarë dhe i mungonte një tufë flokësh.
Grimierja dëshmoi edhe për padinë e Johnny Depp kundër tabloidit britanik Sun. Amber pretendon se, një natë para shfaqjes, Depp e ka rrahur atë, duke i shkaktuar mavijosje në fytyrë dhe një buzë të gjakosur.
Dhe ndërsa SHBA-ja përballet me çështje si lufta në Ukrainë, polemikat e abortit, inflacioni dhe Covid-i, ish-presidenti Donald Trump nuk mundi t’i rezistonte komentimit të gjyqit në platformën e tij “Truth Social”: “Çfarë çifti i bukur”, tha ish-shefi i Shtëpisë së Bardhë.
Marrë nga La Repubblica, përshtati në shqip Gazeta Si
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
