.png)
Gazeta Si - Kryetari i bashkisë së Nju Jorkut, Eric Adams, akuzohet se ka ngacmuar seksualisht një ish-kolege në vitin 1993.
Lajmin e raporton “The Messenger”, duke cituar disa burime. Për Adams, akuza është një goditje e re pas polemikave mbi hetimin e FBI-së për korrupsion të dyshuar në fushatën e tij zgjedhore. Kryebashkiaku u mbrojt duke u deklaruar i pafajshëm.
“Nuk është e vërtetë, nuk ka ndodhur kurrë”, u mbrojt kryebashkiaku i Nju Jorkut, Eric Adams.
Gruaja që akuzon Eric Adams synon të marrë të paktën pesë milionë dollarë me veprimin ligjor të nisur kundër kryebashkiakut.
Letërthirrja prej 3 faqesh, pretendon sulme seksuale, sulm, diskriminim në punë bazuar në gjini dhe seks, hakmarrje, mjedis armiqësor të punës dhe shkaktim të qëllimshëm të shqetësimit emocional.
Paditësja kërkon dëmshpërblim prej të paktën 5 milionë dollarësh së bashku me tarifat e avokatëve.
Bashkia i mohoi me shpejtësi akuzat, duke deklaruar se kryebashkiaku Adams nuk e njeh akuzuesen dhe nëse janë takuar ndonjëherë, ai nuk e kujton atë.
Zëdhënësi, theksoi se Adams nuk do të dëmtonte kurrë fizikisht një person tjetër dhe mohon me forcë çdo pretendim të tillë.
Akti për të Mbijetuarit e Rritur, i bërë ligj nga guvernatorja Kathy Hochul në maj të vitit të kaluar, hoqi kufizimet e zakonshme kohore për padinë mbi sulmet e dyshuara seksuale për një periudhë njëvjeçare, duke çuar në një rritje të padive civile kundër individëve të shquar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
