“Korrupsion, nepotizëm dhe abuzime seksuale në burgje”

Deputeti Lefter Maliqi akuzoi për tendera korruptivë, emërime nepotike e deri tek abuzime seksuale me punonjëset femra në sistemin shqiptar të burgjeve.

Maliqi thirri në një interpelancë në Kuvend këtë të enjte ministren e Drejtësisë, Etilda Gjonaj që e akuzoi për këtë drejtpërdrejtë bashkë me Drejtorin e Përgjithshëm të Burgjeve, Agim Ismaili.

Deputeti akuzoi se vlera e tenderave fryhet artificialisht, duke sjellë si shembull çmimin e vezës, që sipas tij, në një tender nga 14 lek në treg, për të burgosurit është blerë me 21 lek.

“Tenderat për ushqime në burgje korruptive, tender emergjent 347 milionë për bukën e të burgosurit. E njëjta firmë fiton edhe tenderin tjetër prej 250 mln për djathë e qumësht. Firma u kap me shkelje, por tenderin ja kalon djalit të tij. 600 e ca milionë lekë për ilaçe dhe nevoja emergjente për të burgosurit e sëmurë nga një firmë. 3.5 milionë tani në kohën e pandemisë dhe shumë tendera të tjerë, atë të vezëve, nga nga 14 lek që është çmimi i vezës në tregun e pakicës në 21 lek”, u shpreh ai.

Maliqi akuzoi më tej Drejtorin e Përgjithshëm të Policisë për shkelje të ligjit me emërimet e komanduara përtej afateve dhe për largimin e punonjësve që ishin pengesë në skemat korruptive.

“250 janë komandimet në sistemin e burgjeve, që nga nëndrejtori i përgjithëm, hoqët shefin e personelit, mikun e Xhemal Qefalisë, që i bënte fushatën. Hoqët drejtorin Juridik, mikun e Majkos. Hoqi edhe disa drejtorë të tjerë, për të patur situatën e nën kontroll, për të bërë ça i do kokrra e qejfit. Vartësin e vëllati e ka emëruar drejtor burgu", vijoi më tej Maliqi.

Deputeti i opozitës parlamentare foli edhe për abuzime seksuale në sistemin e burgjeve.

“Ai bën edhe sfilata mode në zyrë. I doni me foto ju? Janë edhe 2 police të tjera në Korçë, që i kanë shkuar në zyrë këtij drejtori barkderr dhe kanë denoncuar për abuzime seksuale me eprorët e këtyre dhe ky ça bën?! I çon në detyra më të vështira policet dhe drejtorët i mban të komanduar”, tha Maliqi.

Ministrja e Drejtësisë, Etilda Gjonaj hodhi poshtë akuzat. Ajo renditi një sërë reformash në sistemin e burgjeve, duke u ndalur tek sistemi 41bis, që sipas Gjonajt ka shkëputur lidhjet e të burgosurve me krimin jashtë qelisë.

Gjonaj nënkuptoi se Lefter Maliqi po bën protagonizëm me këtë çështje për të realizuar ambicien e tij për t’u rizgjedhur deputet.

“I keni merak burgjet, se periudha më e gjatë e punës ka qenë në institucionet e mia të varësisë. Nuk e di, mbase ju nevojitet kjo gjë se mbase ju ndihmon që të bëheni deputet. Por, në fund të fundit janë vlerësimet dhe raportet që kanë rëndësi për mua”, tha Gjonaj.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.