.png)
Gazeta Si - Shefi i kirurgjisë në QSUT dhe njëkohësisht rektori i Universitetit të Mjekësisë, Arben Gjata është paraqitur këtë të premte sërish në SPAK për t’u marrë në pyetje në lidhje me rolin e tij në skandalin e kontratës të partneritetit publik privat për sterilizim e instrumenteve kirurgjikale.
Burime bëjnë me dije se në pyetje do të merret dhe Genc Byrazeri, i cili ka qenë anëtar i Komisionit të tenderit të sterilizimit.
Si për Arben Gjatën, ashtu edhe për Byrazerin, GJKKO ka caktuar masat e sigurisë “detyrim paraqitje”.
Në lidhje me abuzimet me tenderin e sterilizimit, SPAK ka arrestuar ish-zëvendësministrin e Shëndetësisë, Klodian Rjepaj, si dhe biznesmenin që ka fituar koncesionin Ilir Rrapaj.
Si dhe ka caktuar masat “arrest shtëpie” për: Saimir Kadiu, Drejtor Ekonomik, dhe Marsela Serjanaj, Drejtoreshë Juridike. Si dhe masat “detyrim paraqitje” edhe për Pertef Mersini dhe Naile Ajazi.
Shtatë zyrtarët akuzohen për veprat penale “Falsifikim i dokumentave” dhe “Shpërdorimi i detyrës”, të dyja të kryera në bashkëpunim. Ndërsa, biznesmeni Ilir Rrapaj akuzohet për veprën penale “Mashtrimi”, me pasoja të rënda.
GjKKO i kishte firmosur 8 urdhër-arrestet e lëshuara nga prokurorët Ened Nakuçi dhe Edvin Kondili që më 23 qershor 2023, por u ekzekutuan dy muaj më pas, 16 – 17 gusht 2023. Rrapaj u prit që të hynte në Shqipëri nga Italia dhe u arrestua në Dhërmi ku kishte ardhur me pushime.
SPAK thotë se koncensioni i sterilizimit të mjeteve mjekësore është dhënë në kushtet e konfliktit të interesit, pasi ish-zëvendësministri, i cili drejtonte edhe komisionin e përzgjedhjes së kompanive, kishte njohje të mëparshme me biznesmenin.
Gjithashtu, Prokuroria e Posaçme rendit disa udhëtime të Rrapajt me ish-ministrin e Shëndetësisë, Ilir Beqajn dhe ish-zëvendësministrin e Shëndetësisë, Klodjan Rjepajn, para dhe pas dhënies së koncensionit.
Për këtë dosje në masa sigurimi arrest shtëpie dhe detyrim për t’u paraqitur janë edhe 6 zyrtarë të tjerë, teksa hetimet vijojnë për ish-ministrin e Shëndetësisë, Ilir Beqajn dhe ish-ministrin e Financave, Shkëlqim Canin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
