.png)
Gazeta Si - Gjykata e Posaçme kundër Korrupsionit dhe Krimit të Organizuar ka rrëzuar kërkesën e dhëndrit të ish-kryeministrit Sali Berisha, Jamarbër Malltezit, për kthimin e telefonit celular.
Malltezi kishte kërkuar kthimin e telefonit, kompjuterëve dhe disa materialeve të tjera shkresore, të sekuetruara nga ana e SPAK.
Gjyqtarja Gjoka la në fuqi masën e sekuestros me argumentin se janë sekuestruar në cilësinë e provës materiale.
LEXO EDHE:
Apeli i GJKKO-së cakton datën dhe gjyqtaren e seancës për masat ndaj Berishës dhe Malltezit
Ndërkohë Malltezi mbahet i arrestuar për akuzën e korrupsionit dhe pastrimit të parave në lidhje me hetimet e nisura për dosjen e privatizimit të ish-kompleksit sportiv "Partizani". Në po të njëjtën dosje është në akuzë dhe hetim edhe ish-kryeministri Sali Berisha, ndaj të cilit është caktuar masa e sigurisë "detyrim paraqitje".
Sipas prokurorisë, dyshimet janë për favorizim në miratimin e ligjeve dhe akteve të tjera për të çuar drejt privatizimit të kompleksit Partizani, i cili ka qenë terren sportive.
Së bashku me ta, nën hetim është edhe Fatmir Bektashi, pronar i kompanisë "Kontakt", pasi dyshohet se përmes këtij subjekti ka përfituar në mënyrë të padrejtë edhe Malltezi.
Të akuzuarit kanë kundërshtuar akuzat e ngritura, duke theksuar se Malltezi ka përfituar pjesën që i takon si ish-pronar i truallit dhe se ka kryer veprimtari ligjore në kompaninë që ndërtoi mbi sipërfaqe.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
