Gazeta Si - Më 20 nëntor në ora 09:00 do të mbahet seanca në Apelin e GJKKO-së seanca për masën e sigurisë ndaj ish-Kryeministrit Sali Berisha dhe dhëndrit të tij, Jamarbër Malltezi të akuzuar dhe në hetim për aferën e privatizimit të klubit sportiv “Partizani”.
Gjyqtarja e kësaj çështje është caktuar me short Iliriana Olldashi.
Në të njëjtën ditë, në orën 10:00, Sali Berisha duhet të paraqitet para oficeres së BKH-së Adelajda Metaj për të firmosur, për shkak të masës së sigurisë “detyrim paraqitje”.
Ankimimi ishte bërë një ditë më parë më 14 nëntor nga avokatët mbrojtës të Sali Berishës dhe Jamarbër Malltezit, të cilët kërkojnë rrëzimin e masave të sigurisë.
Berisha ka masë sigurie detyrim paraqitje dhe ndalim për daljen jashtë vendit, ndërsa Malltezi është nën “arrest në burg”.
Më herët, GJKKO i ka dërguar një tjetër shkresë Berishës në kryesinë e Kuvendit, ku e njofton atë për lënien në fuqi të masës, “detyrim paraqitje”.
Dokumenti është protokolluar nga ana e Kuvendit, ndërsa mësohet se ish kryeministrit i është dërguar edhe përmes postës elektronike, email, vetëm faqja e parë e praktikës që GJKKO ka dërguar në Kuvend.
Gjykata ka vendosur ndaj Berishës masën e sigurisë “detyrim për paraqitje”, të hënën e parë dhe të tretë të çdo muaji, si dhe “ndalimin për të dalë jashtë vendit”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.