.png)
Këshilli i ri i Emërimeve në Drejtësi zhvilloi këtë të mërkurë mbledhjen e parë dhe që në fillim ka renditur kërkesën e parë; punonjës dhe fonde shtesë për të përballuar fluksin e punës për këtë vit.
Pas konstituimit, KED ka vlerësuar se numri i personelit ekzistues, me të cilin punoi edhe KED e vitit të kaluar është i pamjaftueshëm.
“Duke vlerësuar angazhimin dhe ngarkesën e madhe të punës së përballuar gjatë vitit 2020, por edhe disa probleme që u shfaqën në këtë drejtim, Këshilli vlerësoi se ky personel është i pamjaftueshëm për të realizuar mbështetjen e plotë dhe efektive të veprimtarisë së KED për vitin 2021. Prandaj, nisur nga parashikimet kushtetuese dhe ligjore për realizimin plotësimit të vendeve vakantë në Gjykatën Kushtetuese për vitin 2021, u vlerësua nevoja për shtesë të menjëhershme të personelit mbështetës nga Gjykata e Lartë për Këshillin, krahas vijimit të plotësimit të mëtejshëm të nevojave me buxhet të veprimtarisë së Këshillit”, thuhet në deklaratën shoqëruese të mbledhjes së parë të KED2021.
Këshillit i është ngarkuar detyra që të plotësojë dy vakancat e mbetura dhe të zëvendësojë Vitore Tushën, që i ka përfunduar mandati si anëtare në Gjykatën Kushtetuese që prej marsit të 2017-ës. Dy vakancat dhe zëvendësimi i Tushës duhet të bëhet me kandidatë të propozuara nga Gjykata e Lartë.
Por, vetë Gjykata e Lartë është larg numrave të anëtarëve që i duhen për të realizuar këtë proces, pasi aktualisht ka vetëm 3 anëtarë nga 19 anëtarë që duhet të ketë në total dhe 14 që nevojiten për të plotësuar kuorumin e vlefshmërisë së mbledhjeve të gjyqtarëve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
