Komisioni i Ankesave dhe Sanksioneve pranë KQZ ka pranuar pjesërisht ankimin e Partisë së Lirisë për vendimin e kryekomisionerit Ilirjan Celibashi që i la mandatin e kryetarit të Bashkisë së Kuçovës, Kreshnik Hajdari.
Sipas vendimit të KAS, Celibashi do të shqyrtojë përsëri kërkesën për heqjen e mandatit të Kreshnik Hajdarit, i cili akuzohet nga opozita se ka fshehur një dënim të formës së prerë të marrë nga Gjykata e Greqisë.
“KAS vendosi pranimin e pjesshëm të kërkesës ankimore paraqitur nga Partia e Lirisë.
Shfuqizimin e vendimit të komisionerit shtetëror të zgjedhjeve për shqyrtimin e rezultatit të verifikimit të prokurorit të përgjithshëm për subjektin Kreshnik Hajdari, kryetari i bashkisë Kuçovë.
Kthimin e çështjes për shqyrtim te Komisioneri Shtetëror i Zgjedhjeve duke e lënë detyrë që të shqyrtojë faktin nëse KQZ në trajtimin e kërkesës ndodhet në kushtet e nenit 66 të Kodit të Procedurës Administrative”, thuhet në vendimin e KAS.
Partia e Lirisë ka kërkuar heqjen e mandatit të Kreshnik Hajdarit pasi nuk ka deklaruar dënimin në Greqi në formularin e dekriminalizimit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.