Ka zëra që thonë se largimi i Miralem Pjaniç nuk e ka shqetësuar trajnerin Mauricio Sarri, sepse klubi e ka garantuar atë për afrimin e Zhorzhinjos. Drejtuesit e Juventusit po bëjnë gjithçka për të veshur bardhezi mesfushorin brazilian, një nga të preferuarit e Sarrit që nga koha kur drejtonte Napolin. Ishte Sarri që e kërkoi me çdo kusht Zhorzhinjon edhe te Çelsi.
Klubi londinez është dakord për shitjen e mesfushorit, por kërkon 60 milionë euro. Një shifër jo e vogël, po të kemi parasysh periudhën që po kalojmë, që ka ndikuar edhe te tregu i lojtarëve. Për këtë arsye, Paratiçi kërkon të përfshijë në tratativa edhe kartonin e Adrien Rabiot, francezit që u bashkua me Juventusin verën e kaluar me parametra zero, por deri tani nuk u është përgjigjur pritshmërive, pavarësisht paraqitjes së mirë në ndeshjet e fundit. Kalimi i Rabiot te Çelsi mund të përgjysmonte shifrën e kërkuar nga anglezët për Zhorzhinjon.
Për Rabiot ka një interesim edhe nga Evertoni i Karlo Ançelotit. Juventusi tani ka në plan të sjellë edhe Zhorzhinjon për të bërë një mesfushë të re, bashkë me barazilianin tjetër Artur, i ardhur nga Barcelona vetëm pak ditë më parë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.