Gazeta Si – Dopieta e sulmuesit Dushan Vlahoviç nga distanca dhe një gol i Kiezës i kanë dhënë fitoren Juventusit ndaj Sasuolos. Bardhezinjtë afrohen sërish në -2 pikë nga Interi kryesues.
Juventusi ka mbyllur javën e 20-të Serisë A, duke mundur 3-0 Sasuolon. Në ‘Allianz Stadium’ ndriçoi gjatë pjesës së parë ylli i Vlahoviç, autor i dy golave vendimtarë, me dy të majta fituese nga distanca. Në minutën e 15-të ai zhbllokoi rezultatin, duke befasuar portierin me një gjuajtje të thatë.
Pastaj sulmuesi përsëriti veten në minutën e 37-të, duke shënuar nga një goditje dënimi në hyrje të zonës. Në pjesën e dytë mund të veçohet një pritje e shkëlqyer e Sheznit ndaj Berardit dhe pastaj goli i Kiezës një minutë para fundit të kohës së rregullt. Skuadra e Alegrit shkon -2 nga Interi.
Nedim Bajrami, fantazisti i Kombëtares shqiptare dhe Sasuolos, nuk luajti asnjë minutë në këtë ndeshje. Ai qëndroi gjithë kohën në stol.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.