.png)
Nga Gazeta 'Si'-Kanë vijuar përgjatë gjithë natës përleshjet e ashpra mes ushtrisë izraelite dhe militantëve të Hamasit, tashmë brenda territorit të qytetit të Gazës, i cili është i rrethuar nga të gjitha anët.
Luftime ka pasur në Cisjordani, teksa 51 persona u vranë gjatë një aksioni të ushtrisë së Izraelit në një tjetër kamp refugjatësh, këtë herë në zonën e Maghazit.
Autoritetet izraelite bëjnë me dije se një tjetër korridor humanitar është krijuar për kalimin e civilëve që duan të largohen nga Gaza, i cili do të zgjasë për të paktën 4 orë. Një ditë më parë, IDF akuzoi Hamasin se sulmoi korridore të ngjashme duke qëlluar ndaj civilëve.
Në një njoftim për mediat Forcat e Mbrojtjes së Izraelit, bëjnë me dije se që nga nisja e ofensivës ndaj militantëve të Hamasit, janë shkatërruar më shumë se 2500 baza të tyre përgjatë Rripit të Gazës, duke përfshirë këtu vendstrehime, apo depo armatimesh.
Situata humanitare në Gaza është katastrofike, ku aksesi në ujë të pijshëm e ushqime është pothuajse i pamundur, teksa raportohet nga agjencitë humanitare të OKB se më shumë se 1.5 milionë banorë janë larguar nga shtëpitë e tyre.
Nga ana tjetër, presidenti i Shteteve të Bashkuara, Joe Biden u shpreh se ka pasur progres në bisedimet me autoritetet izraelite për mundësimin e ndërprerjes së përkohshme të luftimeve për qëllime humanitare.
Sipas tij, bisedimet e sekretarit Blinken, gjatë vizitës së tij në Lindjen e Mesme, kanë qenë tepër të frytshme dhe shpresëdhënëse.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
