.png)
Gazeta Si – Gjatë vizitës së tij në Romë të mërkurën, presidenti ukrainas, Volodymyr Zelenski diskutoi për dronët, mes shumë temave të tjera.
Ai i diskutoi ato me kryeministren Giorgia Meloni, por më e rëndësishmja, ndihmësit e tij i diskutuan ato me zyrtarë nga Ministria Italiane e Mbrojtjes.
Zelenski prezantoi atë që ai e quan Marrëveshja e Dronëve, një marrëveshje për të ndarë ekspertizën ushtarake ukrainase – e cila është rritur në mënyrë dramatike gjatë katër viteve të luftës – me industritë e mbrojtjes të vendeve aleate në këmbim të sistemeve dhe armëve që Ukraina nuk i prodhon, siç janë raketat “Patriot”.
Gjatë katër viteve të fundit, Ukraina është bërë një nga vendet më të përparuara në botë në projektimin dhe përdorimin e dronëve, të zhvilluar pjesërisht për të zvogëluar numrin e ushtarëve të dërguar në front dhe mbi të gjitha, për të ulur kostot krahasuar me sistemet konvencionale të mbrojtjes ajrore.
Thënë thjesht: meqenëse Ukraina nuk kishte para për të blerë raketa interceptuese, në vend që të lëshonte raketa shumë të shtrenjta kundër dronëve rusë siç kishte bërë gjithmonë, ajo filloi të lëshonte dronë kundër dronëve.
Që nga viti 2022, janë krijuar kompani të shumta për të zhvilluar këtë lloj sistemi mbrojtës dhe sot Ukraina është e aftë të prodhojë qindra mijëra dronë interceptues në muaj.
Vetëm një kompani, “General Cherry”, prodhon 100,000 në muaj. Ukraina ka përsosur edhe teknologji të tjera, të tilla si sensorë për njohjen e avionëve që afrohen dhe sisteme bllokimi komunikimi, të cilat i ngatërrojnë dronët.
Ukraina ka ndërtuar gjithashtu një reputacion në këtë sektor pas bashkëpunimit me vendet e Gjirit Persik të sulmuara nga dronë të lëshuar nga Irani.
Në javët e fundit, ekipe ekspertësh ukrainas janë dërguar në Katar, Emiratet e Bashkuara Arabe dhe Arabinë Saudite për të ndihmuar forcat e tyre të armatosura.
Meloni konfirmoi interesin e Italisë për zhvillimin e prodhimit të përbashkët dhe tha se Ukraina është bërë një “komb kryesor” në sektorin e dronëve.
Opsioni më konkret është të nisë bashkëprodhimin me “Leonardo”-n, një kompani shtetërore dhe një më të mëdhatë dhe më të rëndësishme të mbrojtjes në Evropë.
“Leonardo” ndryshoi kohët e fundit udhëheqjen: Lorenzo Mariani zëvendësoi ish-ministrin Roberto Cingolani, mes disa polemikave mbi zgjedhjen e sponsorizuar nga qeveria.
“Ekspertiza jonë, përvoja jonë ushtarake, aftësitë tona mbrojtëse në fushat e dronëve, raketave, luftës elektronike dhe ndarjes së të dhënave: ne propozojmë t’i kombinojmë të gjitha këto me aftësitë e partnerëve tanë”, tha Zelenski.
Detajet operacionale të bashkëpunimit midis Italisë dhe Ukrainës janë ende duke u finalizuar dhe do të varet nga strukturat teknike të të dy vendeve që ta zhvillojnë projektin në javët në vijim.
Alexander Kamyshin, ish-ministër i Industrive Strategjike dhe tani këshilltar përgjegjës për arsenalin ukrainas dhe koordinimin e marrëveshjeve për hapjen e fabrikave të armëve në Evropë, synon të hapë të paktën dhjetë fabrika deri në fund të vitit. Italia nuk është ende në listë, por pas takimit të së mërkurës, negociatat janë duke u zhvilluar.
Përveç dronëve, Meloni dhe Zelenski diskutuan humbjen zgjedhore të Viktor Orbán në Hungari (Orbán kishte bllokuar një kredi evropiane prej 90 miliardë eurosh për Ukrainën) dhe luftën në Lindjen e Mesme.
Pas takimit me Melonin, Zelenski vizitoi gjithashtu Pallatin Quirinale për të takuar Presidentin Sergio Mattarella, i cili është gjithashtu kreu i forcave të armatosura.
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje