.png)
Në një interpelancë të thirrur nga deputeti Enkelejd Alibeaj për amnistinë penale, Ministri i Drejtësisë, Ulsi Manja, deklaroi të enjten në Kuvend se asnjë zyrtar i lartë i korruptuar që është dënuar nga GJKKO nuk përfitoi nga amnistia. Sipas Manjës, janë vetëm 8 të dënuar nga GJKKO që janë amnistuar, sipas tij, asnjë prej tyre simbol i korrupsionit
“Kjo interpelancë nuk ka asgjë urgjente. Nuk ka asgjë urgjente, është një ligj që u votua në Kuvend... Amnistia është kompetencë e Kuvendit dhe jo KM, aq më pak e ministrit. Ministri mban përgjegjësi politike për draftin, por jo për ligjin që voton Kuvendi në sovranitet të plotë.
Nuk kam mashtruar askënd, por kam shprehur publikisht qëndrimin e qeverisë, për të mos amnistuar asnjë zyrtar të lartë të dënuar për korrupsion. Ata që kanë përfituar me ulje dënimi të dënuar nga GJKKO, për veprat penale shkelje e barazisë në tenderë, janë shtetas të zakonshëm ose nëpunës, që do i pasqyroj me emra, janë vetëm 8 dhe asnjë prej tyre nuk është simbol i korrupsionit. Ndryshimet janë diskutuar në komisione, edhe amendamenti i Bardhit ka marrë dakordësinë e ministrisë, janë bërë diskutimet në Komisione dhe 116 deputetë dhanë votën pro kësaj amnistie. Nëse doni mendimin tim si Ulsi Manja, po kjo amnisti në raport me nevojat dhe garantimin e standardeve, kjo amnisti është e butë. Do duhej të ishte më e gjerë se çfarë ishte. Sot që flasim edhe pse është zbatuar, janë 4918 të paraburgosur dhe të dënuar”, tha Manja.
Më herët, deputeti i Partisë Demokratike, Enkelejd Alibeaj, iu referua medias kur tha se janë mbi 100 të dënuar për korrupsion që u amnistuan
“Mediat kanë raportuar sipas informacionit të marrë nga SPAK, mbi 100 të dënuar për korrupsion u amnistuan. Një ligj i gatuar në errësirën e natës, në shkelje të procedurës parlamentare, me shpejtësi, pjellë e një pazari transversal të pamoralshëm politik, nxori nga burgu apo uli dënimin e mbi 100 të dënuarve për korrupsion (e me gjasë të tjerë do vijojnë të përfitojnë ditët në vazhdim).
Mbi 110 deputetë u bënë bashkë për të nxjerrë të korruptuarit nga burgu.
Ajo që publiku është i interesuar të dijë është se përzë janë liruar të dënuarit nga GJKKO. Cilët ishin propozuesit. A u konsultuan ndryshimet me institucionet e drejtësisë? Akoma nuk keni publikuar listën e përfituesve. Sa ishte numri i përfituesve nga të dënuarit e GJKKO. S’dua ta bëj një lojë të neveritshme shifrat, por arsyet e vërteta të miratimit të amendamenteve natën janë politike. Dihet mirë se cilat janë mesazhet që nëpërmjet kësaj amnistie ju dërguan publikut shqiptar”, tha Alibeaj
Lista e emrave të 8 zyrtarëve që përfituan sipas Ulsi Manjes:
Edmond Z. I, i janë falur 13 ditë
Marginglen M. I dënuar shkelje të barazisë së tenderave i janë falur 5 muaj
Marvin M, i dënuar 2 vite, i janë falur 9 muaj
Admir B, i janë falur 3 muaj e 25
Eduard. R, është dënuar me 3 vite e 6, i është falur 1 vit burg
Hamza. T, i dënuar me 1 vit, i janë falur 4 muaj
Ubrahim G, i dënuar 8 muaj, i janë falur 26 ditë
Erion.b, i janë falur 14 ditë
Lulzim Ç, është dënuar për ushtrim të ndikimi të paligjshme 1 muaj e 8 ditë
(Ulsi Manja: Këto të 8 në 20 përfituesit me ulje dënimi, kanë qenë për një nga veprat që listova. Të tjerët janë dënuar nga GJKKO por kanë përfituar për vepra të tjera)
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
