Gazeta Si – Interi ka mundur Lacion 3-0 dhe ka shkuar në finalen e Superkupës së Italisë, ku do të ndeshet me Napolin e kualifikuar një ditë më parë ndaj Fiorentinës. Turam, Çalhanoglu me penallti dhe Fratezi shënuan për skuadrën e Inzagit. Të hënën e 22 janarit finalja në Riad.
Markus Turam zhbllokoi shifrat në pjesën e parë, ndërsa Barela goditi traversën. Sapo filloi pjesa e dytë Çalhanoglu ktheu në gol një penallti të akorduar nga VAR-i, pastaj ishte radha e Lautaro Martinez të godiste traversën. Megjithë lëvizjet e Sarrit nga stoli, Lacio nuk mundi të futej në lojë në asnjë moment.
Në fund kishte vend edhe për një gol të 3-të nga Fratezi, pas një kundërsulmit të shpejtë të Interit. Imobiles iu anulua goli i nderit nga VAR-i.
Kristjan Asllani dhe Elseid Hysaj, dy futbollistët e Kombëtares shqiptare, u futën në fushë njëri pas tjetrit në 10-minutëshin e fundit të ndeshjes. Hysaj duhet të kthehet në Itali tani, kurse Asllani qëndron në Arabi dhe ka mundësinë të fitojë trofeun e parë të 2024-s në finalen ndaj Napolit, që luhet më 22 janar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.