Gazeta Si – Interi i është përgjigjur Milanit dhe Napolit në javën e dytë të Serisë A, duke mundur 0-2 Kaljarin në transfertë. Dumfris dhe Lautaro Martinez shënuan golat e fitores së lehtë të zikaltërve ndaj skuadrës së Ranierit. Kampionati ka nisur shumë mirë për Interin, me pikë të plota pas 180 minutash, ndërsa Kristjan Asllani vazhdon të vuajë.
Futbollisti shqiptar nuk e ka prekur fushën e blertë gjatë dy ndeshjeve të para të kampionatit me Interin. Mesfushori kuqezi duket i mbyllur në ‘kafaz’ nga trajneri Simone Inzagi dhe ndoshta duhet të mendojë për një skuadër tjetër, ku mund të luajë rregullisht, ose të paktën si zëvendësues.
Asllani ka dalë tashmë rezerva e tretë në mesfushën e Interit, ndërsa për formacionin as që bëhet fjalë. Brozoviç u largua, por lojtari shqiptar, i marrë si zëvendësues i kroatit, nuk po aktivizohet. Ndaj Kaljarit trajneri Inzagi aktivizoi si zëvendësues në mesfushë Fratezin të parin, më pas edhe Sensin, kurse për Asllanin nuk pati asnjë minutë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.