Gazeta Si – Në një intervistë të pak kohëve më parë për Gazeta Si, Indrit Tuci theksonte se ishte gati për një klub më të madh në karrierë dhe për të synuar fanellën kuqezi. Hapin e parë tashmë e ka hedhur, sulmuesi 23-vjeçar ka firmosur për klubin e njohur të Spartës së Pragës në Çeki.
Ish-lojtari i Shpresave largohet nga Lokomotiova e Zagrebit dhe bashkohet me mesfushorin Qazim Laçi në një skuadër. Sparta e Pragës e ka prezantuar blerjen e Tucit me një video, ku ai telefonon pikërisht Laçin. Mesfushori kuqezi i uron mirëserdhjen, ndërsa sulmuesi prezantohet për tifozët e Spartës.
📞 Uvidíme se na Letný, Qazime 🇦🇱📱 #acsparta pic.twitter.com/PVSiylGL3W
— AC Sparta Praha (@ACSparta_CZ) December 29, 2023
Kalimi te një emër i njohur i futbollit europian si Sparta e Pragës konsiderohet një lëvizje e rëndësishme për Indrit Tucin. Sulmuesi ka karakteristika të ngjashme me Cikalleshin dhe Dakun. Aktivizimi me Spartën mund ta ndihmojë atë për të fituar një ftesë nga Silvinjo në të ardhmen.
Kampionati kroat ndërkohë konfirmohet edhe një herë si një trampolinë e mirë për futbollistët shqiptarë. Rrugën e Tucit kanë ndjekur më parë edhe emra të tjerë, si Myrto Uzuni, Sokol Cikalleshi, Amir Rrahmani e të tjerë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.