Kryetari i Partisë Demokratike, Lulzim Basha tha në bashkëbisedimin e së martës me gazetarët se personat kyç për kontratat e inceneratorëve po kërcënohen, ndaj dhe kërkoi ndërhyrjen e SPAK.
“Prej më shumë se një jave i kërkoj SPAK-ut të nisë hetimet për aferën e mafias së inceneratorëve. Një nga personat kyç për hetimin e inceneratorëve, është vënë nën presion nga mafia. Mafia e plehrave, presion mbi një prej personave kyçë në skemën mafioze të inceneratorëve, Stela Gugallja. Paralajmëroj SPAK-un se nëse ndonjë prej të dyshuarve kryesorë në aferën e plehrave largohet, do të jetë përgjegjësia e SPAK. Veprimi me urgjencë nga SPAK është parandalim i vjedhjes së mëtejshme të parave të shqiptarëve”, tha Basha.
Sipas tij, “të pandehurit sot duhet të ishin në arrest për të shmangur kërcënimin e dëshmitarëve apo zhdukjen e tyre në drejtim të paditur".
Basha nënvizoi se vetëm sot një pagesë 3 milion euro është lëvruar nga thesari për një kontratë me kosto dyfishe për PPP-në në rrugën e Arbrit.
38 milion euro, sipas tij, janë parashikuar në projektbuxhet për luks zyrash, 1.6 milion euro vetëm për zyrën e Ramës, ndërsa 120 milion për PPP-të. Sipas tij, vetëm me fondet e PPP-ve dhe luksit të zyrave, do garantohej gjysma e paketës së rimëkëmbjes.
Në fillim të konferencës, Basha tha se nga raportimet që i vijnë përditë rezulton se numri i të infektuarve që raportohet është shumë më i ulët se numri real i tyre.
“Numri i fataliteteve, po ashtu më i lartë seç raportohet. Edhe transparenca për COVID është kthyer në funksion të propagandës.
Vetëm në spitalin e Matit janë mbyllur disa pavione për shkak të përhapjes së infeksionit.
Sistemi shëndetësor po del jashtë funksioni për shkak të shpërthimit të infeksionit në çdo pavion.
Ky kolaps i sistemit është emergjenca me akute që kanë sot shqiptarët.
Çdo përpjekje për të larguar vëmendjen nga kolapsi i sistemit shëndetësor është kriminal”, tha ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.