‘I vranë gratë dhe i qanë’. Naim Murseli dhe greku, Babis Anagnostopoulos, dy paralele të një krimi makabër

Skenari është i njëjtë: Do vrisnin gratë e tyre dhe do e raportonin si grabitje, duke u shfaqur të pikëlluar në ceremoninë mortore. Rasti i vrasjes së Liridona Murselit në Kosovë solli në vëmendje një tjetër ngjarje po aq të rëndë të ndodhur në 2021 në Greqi ku Babis Anagnostopoulos vrau bashkëshorten e tij 20-vjeçare Caroline Crouch në maj, me një skenar të mirëmenduar deri në detaje, por jo perfekt.

Në rastin e Anagnostopoulos, hetimet zgjatën për muaj të tërë, deri në zbulimin e të vërtetës ndërkohë që në rastin e Murselit, u deshën 24 orë për t’u zbardhur ngjarja.

I pamëshirshëm, Anagnostopoulos vrau bashkëshorten në dhomën e gjumit në banesën e tyre në Glyka Nera, në prani të fëmijës vetëm 1 vjeç, duke raportuar më vonë në polici se në shtëpinë e tij kishte ndodhur një grabitje ku kishte mbetur e vdekur bashkëshortja.

Sjellja e dy vrasësve është e njëjtë. Të dy janë shfaqur në ceremonitë mortore, të trishtuar dhe duke pritur ngushëllime nga të tjerët. Anagnostopoulos mbante në krahë fëmijën e tyre 1 vjeç ndërsa ngushëllonte nënën e viktimës ndërkohë që Murseli qëndronte me dorën në zemër, i trishtuar mes njerëzve.

Psikologia e çiftit, ora që mbante në dorë viktima, dëshmitë e ndryshme dhe mospërputhja me kamerat e sigurisë çoi në zbardhjen e ngjarjes së rëndë në Greqi.

Ai tashmë është i dënuar me burgim të përjetshëm, ndërsa ka disa teza që mund të kenë çuar në vrasjen e bashkëshortës.

Gazetari Stefanos Chios hodhi një bombë të madhe duke publikuar dokumente audio dhe duke pretenduar se Caroline i kishte zbuluar të shoqit tradhtinë, një lidhje të tij me një transeksual të quajtur Emanuela. Madje dyshohet se ai furnizonte kartelat e drogës si pilot dhe kur u zbulua nga bashkëshortja, inskenoi vrasjen e saj.

Ndërkohë që media kosovare kanë folur për një mosmarrëveshje midis çiftit Murseli, ende nuk dihen shkaqet që e çuan Murselin të vriste gruan e tij në makinë ndërkohë që po ktheheshin për në shtëpi.

Murseli ka menduar se ky ishte skenari më i mirë i një vrasjeje, njësoj si Babis.

“Familja është gjithçka”, ishte fraza motivuese që mbante në profilin e saj në rrjetet sociale Liridona Murseli (Ademaj), pa e ditur se dhe vdekja do t’i vinte prej njeriut me të cilin ajo kishte zgjedhur të krijonte familjen e saj.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.