Zgjedhjet europiane/ Beleri, i katërti nga shtatë deputetët e Demokracisë së Re

Shtatë parti fituan vende në Parlamentin Evropian në zgjedhjet e së dielës, të cilat treguan fitime të konsiderueshme për partitë e ekstremit të djathtë të Greqisë, sipas rezultateve zyrtare të publikuara të hënën.

Partia Demokracia e Re e kryeministrit Kyriakos Mitsotakis siguroi 28.31% të votave, duke fituar shtatë vende në Parlamentin Evropian. Fredi Beleri u rendit i katërti në listën e 7 deputetëve me më shumë vota, ndërsa Pirro Dhima i nënti.

Partia kryesore opozitare e majtë, SYRIZA, mori 14.92% të votave, që përkthehet në katër nga 21 vendet e Greqisë në legjislaturën e Bashkimit Evropian. Partia socialiste PASOK doli e treta me 12.79% dhe siguroi tre mandate.

Partia nacionaliste Greke Zgjidhja mori 9.3% të votave, duke fituar dy vende, pak përpara KKE komuniste, e cila mori 9.25% dhe gjithashtu siguroi dy vende.

Tre parti të tjera tejkaluan pragun prej tre për qind të kërkuar për përfaqësim në asamblenë e BE-së. Partia nacionaliste fetare Niky (Fitorja), Kursi për Lirinë dhe Zëri i Arsyes fituan secila nga një vend, me përkatësisht 4.37%, 3.4% dhe 3.04% të votave.

Kryetari i zgjedhur i Bashkisë së Himarës, Fredi Beleri ka reaguar nga qelia e burgut pas publikimit të rezultateve paraprake për zgjedhjet europiane në Greqi, ku ai me shumë gjasa do të jetë deputet në Parlamentin e ardhshëm Europian.

Teksa falënderoi të gjithë mbështetësit që i dhanë votën, Fredi Beleri shton se gjithnjë kishte besuar se drita do të fitojë mbi errësirën.

“Gjatë të gjitha muajve të aventurës sime, më jepte forcë besimi im se drita gjithmonë fiton ndaj errësirës. Dhe se forca e demokracisë mund të përmbysë çdo praktikë puçiste, mjafton që të ketë vullnet dhe besim në një qëllim më të lartë. Siç kishim ne që dhamë këtë luftë. Një luftë për demokracinë, shtetin e së drejtës, liritë dhe dinjitetin e qytetarëve.

Lufta u fitua në kushte të vështira, të paimagjinueshme për një vend që dëshiron të bëhet pjesë e familjes evropiane. Dhe u fitua. Falë nderit, patriotizmit dhe krenarisë së Grekëve.

Dua të falënderoj nga zemra të gjitha Greket dhe Grekët që më nderuan me votën e tyre. Familjen time që u bë gjatë kësaj periudhe mbështetja dhe zëri im. Miqtë në gjithë Greqinë që qëndruan pranë meje në provën më të vështirë të jetës sime. Dhe natyrisht kryeministrin Kyriakos Mitsotakis që më dha mundësinë të jem kandidat, për të cilën do t’i jem gjithmonë mirënjohës”, shkruhet në reagimin e Belerit.

Fredi Beleri, është i treti kandidat më i votuar nga Demokracia e Re, në zgjedhjet europarlamentare në Greqi, ku duket se do të sigurojë një vend në Parlamentin Europian, pasi partia e kryeministrit grek do të përfaqësohet aty me 7 deputetë.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.