.png)
Për herë të parë në historinë e industrisë automobilistike, një në dhjetë makina të reja të shitura në Europë gjatë muajit maj mbante logon e një marke kineze.
Sipas të dhënave të fundit të publikuara nga kompania e analizës së tregut Dataforce, prodhuesit kinezë arritën të sigurojnë një kuotë rekord prej 11% të tregut europian, duke shënuar një kthesë historike në raportet e forcës me gjigantët tradicionalë të kontinentit. Kjo rritje vjen në një moment kur tregu i përgjithshëm europian po shfaq shenja ngadalësimi, duke u zgjeruar me vetëm 3.6% gjatë të njëjtit muaj, çka dëshmon se operatorët nga Azia po fitojnë terren me një ritëm shumë më të shpejtë se mesatarja e industrisë.
Ndryshe nga sa mendohej fillimisht, ky ekspansion agresiv nuk po udhëhiqet ekskluzivisht nga makinat plotësisht elektrike, por po mbështetet fort te modelet hibride dhe ato plug-in hibride.
Prodhuesit kinezë u treguan më fleksibël dhe e lexuan më shpejt se rivalët e tyre europianë ecurinë e konsumit, duke kuptuar se blerësit nuk ishin ende gati të kalonin masivisht te mjetet me bateri absolute. Pasi zgjeruan me shpejtësi ofertën e tyre me motorë të kombinuar, markat kineze kanë arritur të zënë aktualisht afërsisht një të katërtën e të gjitha shitjeve në segmentin e makinave hibride në Europë, pa cënuar rritjen progresive që po regjistrojnë edhe në sektorin e makinave elektrike.
Në analizën e këtij suksesi, agjencia Bloomberg vëren se avantazhi kryesor konkurrues i Kinës mbetet raporti i pakrahasueshëm mes çmimit dhe cilësisë. Makinat kineze ofrojnë më shumë pajisje teknologjike, fuqi motorike dhe asiste rrugore për të njëjtën vlerë monetare ose edhe më lirë se modelet homologe të prodhuara në Europë. Si shembull konkret në treg sillet rasti i modelit SUV MG S9, i cili vjen me performancë më të lartë dhe kushton dukshëm më pak se rivali i tij i drejtpërdrejtë europian Volkswagen Tayron. Ky raport ka bërë që regjistrimet e markave të veçanta të shpërthejnë, ku BYD shënoi një rritje prej 136.6%, grupi Cheri u zgjerua me mbi 240% dhe Leapmotor arriti një rritje eksponenciale prej rreth 465%.
Kjo dinamikë e re po shoqërohet me një transformim të thellë të preferencave të konsumatorëve dhe një humbje të ndjeshme terreni për emrat historikë si Volkswagen, Renault dhe Stellantis, të cilët po përballen me rënie të shitjeve ose rritje krejtësisht modeste. Ndërkohë që shitjet e automjeteve tradicionale me benzinë dhe naftë pësuan një rënie të fortë prej rreth 19%, tregu po zhvendoset me shpejtësi drejt teknologjive të reja, ku mjetet elektrike dhe ato hibride përbëjnë tashmë 67.5% të të gjitha regjistrimeve të reja në Europë.
Gjeografikisht, Europa Jugore, me vende si Spanja, Italia dhe Greqia, është kthyer në tregun kyç për depërtimin e këtyre markave, kryesisht për shkak të ndjeshmërisë më të lartë të konsumatorëve vendas ndaj çmimeve ekonomike.
As masat mbrojtëse dhe tarifat doganore shtesë të vendosura kohët e fundit nga Bashkimi Europian për automjetet elektrike të prodhuara në Kinë nuk kanë arritur ta frenojnë këtë trend. Prodhuesit azianë po e përshtatin me shpejtësi strategjinë e tyre duke anashkaluar barrierat tregtare përmes fokusit te modelet hibride, të cilat nuk preken në të njëjtën masë nga tarifat, si dhe përmes investimeve direkte në infrastrukturën prodhuese brenda kufijve të bllokut.
Në krye të kësaj ofensive qëndron kompania BYD, e cila po zgjeron me shpejtësi rrjetin e shpërndarjes dhe po ndërton një fabrikë të madhe prodhimi në Hungari, me synimin e deklaruar ambicioz për t’u shndërruar në prodhuesin më të madh të makinave në shkallë globale brenda pesë viteve të ardhshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje