Gazeta Si - Këshilli i Përgjithshëm i Dhomës së Avokatisë ka vendosur sërish bojkotim pa afat për seancat gjyqësore në të gjithë vendin kundër hartës së re gjyqësore.
Për masat e sigurisë, këshilli ka vendosur bojkot të paktën deri në 10 ditët e ardhshme.
Këtu përjashtohen vetëm seancat me të mitur, që sipas vendimit të Këshillit të Përgjithshëm, nuk duhen braktisur.
Në përshkallëzimin e bojkotit, këshilli vendosi të hedhë për diskutim mbajtjen e protestave nga avokatët para Këshillit të Lartë Gjyqësor.
Ndërkohë, Dhoma Kombëtare e Avokatisë kërkon masa ndëshkimore për avokatët që thyen bojkotin e vendosur në kundërshtim të hartës së re gjyqësore.
Kreu i Dhomës së Avokatisë, Maks Haxhia, tha se do të kërkojë ndjekje disiplinore për ata kolegë që kanë marrë pjesë në seanca, duke shkelur vendimin.
Haxhia theksoi se disponon edhe emrat e avokatëve që kanë thyer këtë bojkot në gjykatat e vendit.
“I kam bërë prezent me emra konkret avokatët, me çështje konkrete, ditë dhe orë konkrete që ata kanë marrë pjesë në këto seanca në kundërshtim me vendimin e Këshillit të Përgjithshëm. Lidhur me këto, sot unë kam bërë përcjelljet e këtyre materialeve për fillimin e procedimit disiplinor në Komunitetin disiplinor“, - u shpreh Haxhia në një deklaratë për mediat.
Prej javësh, avokatët në të gjithë vendin kanë bojkotuar seancat gjyqësore, pasi kundërshtojnë ndryshimet e bëra në hartën gjyqësore.
Por bojkoti është thyer nga avokatë të ndryshëm në Gjykatat e Tiranës, Shkodrës dhe Durrësit, të cilët kanë dalë kundër këtij vendimi.
Disa ditë më parë, Shoqata e Avokatëve Penalistë, i bëri thirrje ministrit të Drejtësisë Ulsi Manja të reagojë dhe ndërmjetësojë për të zgjidhur këtë situatë.
Avokati i Sajmir Vishaj tha se ministria duhet të ndërhyjë si negociatore për t’i dhnë fund edhe bojkotit pa afat të vendosur për seancat gjyqësore.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.