Nuk ka ndryshim qëndrimi nga grupi parlamentar i PD-së i drejtuar nga Gazment Bardhi lidhur me komisionin e reformës zgjedhore që pritet të mblidhet nesër në mesditë
Pas mbledhjes së grupit, Bardhi tha për mediat se, një reformë e njëanshme mes Ramës dhe grupit të Bashës cenon rendë besueshmërinë dhe vërtetësinë e reformës zgjedhore.
"Reforma zgjedhore duhet të përfshijë shit-blerjen e votës, keqpërdorimin e administratës shtetërore, intimidimin e votuesve dhe administrim korrekt të zgjedhjeve dhe duke mbajtur në konsideratë rezolutën e miratuar nga Komiteti i Stabilizim Asociimit mes BE dhe Shqipërisë ku për herë të parë theksohet nevoja jo thjesht për gjithëpërfshirje por për një përfaqësim të vërtetë të opozitës në komisionin e reformës zgjedhore...
Kuvendi ka një traditë të të funksionit të këtij komisioni dhe tradita është që opozita dhe mazhoranca duhet të kenë numra të njëjtë në komision por vullneti i njërës palë nuk mund ti mbivendoset palës tjetër në këtë komision.
Ky është koncepti se si funksionon komisioni i reformës zgjedhore dhe kjo është dhe kërkesa e deputetëve të opozitës dhe grupit parlamentar të PD.
Vijimi i farsës nga korporata e vitit 2020 në një reformë të njëanshëm zgjedhore që është paralajmëruar të premten është një fasadë e atyre që bllokuan reformën zgjedhore për 22 muaj dhe që i siguruan Ramës mandatin e tij të tretë”, tha Bardhi.
Ndërsa Flamur Noka është shprehur ndër të tjera se nëpër mbledhje nuk diskutohet më çështja e bashkimit.
“Në çdo mbledhje ne diskutojmë aksionin tonë, çështja e bashkimit është e mbyllur, nuk diskutohet më si çështje. Ne vijojmë fazën e fundit që do jetë fuzioni i plotë i partisë. Aksioni ka nisur ashtu siç e kemi thënë. Shqiptarët e kanë një Parlament real dhe ai është te Rruga e ‘Shpresës”, tha Noka.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.