Një rrjet shqiptaro-italian, i dyshuar për trafikim të sasive të mëdha të marijuanës nga Shqipëria drejt Italisë është goditur në kuadër të operacionit të koduar “Sabbia”.
Sipas Policisë italiane, katër shqiptarë dhe një italian u arrestuan në Firence, Siena, Brindizi dhe Vlorë ndërkohë që gjatë procesit hetimor është bllokuar mbi gjysëm tonë marijuanë.
Grupi kriminal është hetuar, sipas policisë italiane, për importimin, transportimin dhe shpërndarjen e sasive të mëdha të marijuanës nga brigjet e Shqipërisë në ato të Pulias.
Trafiku realizohej përmes mjeteve të shpejta detare që niseshin nga Vlora. Po sipas burimeve policore italiane, sasitë e mëdha të narkotikëve dërgoheshin më pas nga rajoni i Pulias në Italinë Jugore në disa nga qytetet kryesore italiane, të njohura për tregun kriminal të marijuanës.
Policia shqiptare nuk ka dhënë hollësi për personin e arrestuar në Vlorë për llogari të drejtësisë italiane, por mediat përtej Adriatikur raportojnë se i ndaluari është Flodian Serjani, një trafikant me lidhje të qëndrueshme në Toskana dhe që udhëtonte shpesh mes Shqipërisë dhe krahinës së Brindisit për të organizuar mbërritjen e ngarkesave.
Operacioni i sotëm u pasua nga hetimet e hollësishme të iniciuara në janar 2018, gjë që bëri të mundur identifikimin e grupit kriminal të organizuar, i përbërë kryesisht nga shqiptarë.
Sa i takon të ndaluarve të tjerë, po sipas mediave italiane, ata janë: Armand Lushaj, Indrit Hamzaj, Julian Alliaj.
Ata kanë gjetur mbështetjen logjistike të atyre që janë pjesë e krimit të organizuar në Puglia, përfshirë Saverio Palman, i cili u arrestua sot.
Droga, nëpërmjet korrierëve, u transportua më pas në vende të ndryshme për tregun italian si në Romë, Napoli, Milono dhe Firence.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.