Lajme

Gjykata e Katanias liron financierin e Habilajve, Nezar Seiti

Gjykata e Katanias liroi në arrest shtëpie Nezar Seitin, i cili cilësohet si ‘financieri’ i grupit të Habilajve. Lajmi i lirimit konfirmohet nga avokati Detar Hysi.

Ai u arrestua në Babicë dhe mbahej në Burgun 313 në Tiranë. Nezar Seiti u ekstradua drejt Italisë më 25 janar të vitit 2018. Ekstradimi drejt Italisë është kërkuar nga vetë Seiti, pasi është shprehur se nuk beson te drejtësia shqiptare. Nga përgjimet e Prokurorisë së Katanias, rezulton se ai ka pasur rolin e financierit të grupit Habilaj dhe kujdesej për blerjen e gomoneve të shpejta, me të cilat pastaj grupi kryente transportin e kanabisit nga Shqipëria drejt Italisë. Gjithashtu, përgjimet konfirmuan edhe se Seiti bënte shpërndarjen e parave mes anëtarëve të bandës.

Ekstradimi i tij hapi një tjetër debat në politikën shqiptare se a duhet të ishte ekstraduar Nezar Seiti, për sa kohë që po hetohej edhe në Shqipëri.

Grupi kriminal ishte në përgjim që prej vitit 2013 dhe në dosjen e Prokurorisë së Katanias, gjatë përgjimeve të disa anëtarëve të grupit përmendej edhe ish-ministri i Brendshëm Saimir Tahiri. Habilajt kanë përdorur emrin e ministrit si të përfshirë në trafikun e kanabisit.

 

Më Shumë