Ndërron jetë një 20-vjeçare në maternitetin e Gjirokastrës. Mësohet se shkak i vdekjes janë bërë komplikacionet pas lindjes.
Viktima është identifikuar si Klea Muxhaj nga fshati Metoq i Sarandës, por e martuar në Zhulat.
Ajo ka sjellë në jetë një fëmijë me operacion dhe gjithçka në momentin e parë ka shkuar mirë. Komplikimet e saj janë shfaqur pas lindjes.
Gjendja sipas kreut të spitalit, Sokol Feruni, u agravua me shpejtësi dhe vajza ndërroi jetë rreth orës 4.00. Sipas tij pritet që ekspertiza dhe autopsia të përcaktojnë shkaqet e vdekjes dhe përgjegjësitë nëse ka të tilla.
Por, nga ana tjetër familjarët e Kleas kanë pretenduar për mjekim të pakujdesshëm dhe akuzojnë mjekët se e kanë vënë re me vonesë përkeqësimin e gjendjes së vajzës.
Sokol Muxhaj vjehrri i vajzës tha se mjekët janë rikthyer në spital me vonesë dhe se mjekimi ka qenë i pavëmendshëm. Edhe vjehrra dhe kunati i viktimës konfirmuan gjendjen shumë të mirë dhe faktin se 20-vjeçarja nuk vuante nga asnjë sëmundje.
Spitali i Gjirokastrës ka reaguar zyrtarisht nëpërmjet një njoftimi për vdekjen e 20-vjeçares pas lindjes.
Në reagim thuhet se e reja pati komplikacione të rënda dhe se mjekët nuk e neglizhuan rastin.
“Spitali Rajonal i Gjirokastrës i shpreh ngushëllimet familjarëve për humbjen e të ndjerës, 20-vjeçares me inicialet K. M., e cila është trajtuar në këtë spital mbrëmjen e djeshme.
Menjëherë sapo është paraqitur në spital 20-vjeçarja është asistuar nga mjekët dhe ka sjellë në jetë foshnjën e saj shëndoshë e mirë”, thuhet në njoftimin e spitalit.
Ndër të tjera thuhet se “Pas ndërhyrjes operatore, e reja ka pasur komplikacione të rënda dhe me gjithë përpjekjet e mëdha të stafit mjekësor nuk ka arritur të mbijetojë. Pritet të kryhet ekspertiza mjekoligjore për ngjarjen. Spitali i Gjirokastrës siguron qytetarët që stafi i kualifikuar i spitalit tonë është në shërbim 24/7 për pacientët”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.