Politike

Gjermania mund t’i vendosë “kufirin tek thana” Serbisë dhe Kosovës

Nëse në përfundim të dialogut mes Kosovës dhe Serbisë arrihet një marrëveshje që prek kufijtë e dy vendeve dhe që nuk miratohet nga Gjermania, Berlini zyrtar do të vendosë bllokadën për të dy vendet në rrugën e integrimit europian.

Politologu dhe analisti gjerman, Bodo Weber thotë se moscenimi i vijave kufitare, jo vetëm në Ballkanin Perëndimor, por në të gjithë rajonin është një qëndrim kokëfortë dhe i konsoliduar i Gjermanisë prej vitesh.

Në një intervistë të dhënë për DW, ai fajësoi Përfaqësuesen e Lartë të Bashkimit Europian, Federica Mogherini, e cila si ndërmjetësuese në këtë dialog nuk duhej të lejonte që në tryezë të shpaloseshin ide të vjetra.

“Si pasojë e mungesës së reagimit nga Brukseli në këtë dialog janë kaluar dhe po kalohen të gjitha vijat e kuqe. Këto vija po shkelen gjithnjë e më fort dhe Bashkimit Europian nuk reagon. Kjo tregon dobësinë e Brukselit”, deklaroi Weber.

Weber mendon se një zgjidhje mund të gjendet pa qenë nevoja e ndryshimit të kufijve. Për këtë ai kujtoi përparimin e bërë në bisedimet e këtij lloji gjatë vitit 2013.

“Ndryshimi i kufijve nuk është i nevojshëm. Dialogu kishte sukses më 2013-ën, kur Serbia ishte në pozicion që të pranonte se Kosova nuk është pjesë e saj”, deklaron ai.

Për analistin gjerman, tematika e vijës kufitare i intereson vetëm Beogradit dhe jo Kosovës.

“Beogradi po përpiqet ta kthejë situatën para vitit 2013, me idenë e ndërrimit të territoreve”, deklaron ai.

Bodo Weber-in nuk e habit qëndrimi i administratës së Donald Trump mbi këtë temë dhe e interpreton atë si vazhdimësi e përpjekjeve dhe nismave të Presidentit amerikan për të përçarë BE-në dhe gjithë rëndin mbi të cilin është ngritur bota perëndimore.


Copyright © Gazeta “Si”



Më Shumë