Deputeti demokrat Agron Gjekmarkaj e ka krahasuar Lulzim Bashën me Enver Hoxhën, duke thënë se ky i fundit ishte ai që ka mbajtur disa nga postet kryesore të shtetit, duke bërë paralelizëm me postin që kreu i PD mori me ndryshimin e statutit sot, atë të kryetarit të Grupit Parlamentar.
Në një reagim, Gjekmarkaj nuk i kurseu ironitë, teksa mes të tjerash thotë se mbledhje e Kuvendit Kombëtar nga Basha ishte si një “festë syneti”, ku “përjashtoi në mënyrë imagjinare ata që nuk i ka”.
Gjekmarkaj shton se PD duhet të bashkohet që të filloje rritjen dhe se ka nevojë për garë dhe institucione të vërteta, përndryshe do t’i “mbetet vetëm e kaluara si kujtim dhe copat aktuale si fosile në xhepat e rrënuesve të panginjur e të pa cipë”.
Reagimi i plotë:
Enver Hoxha i pat mbajtur për disa vjet postet kryesore të shtetit dhe të Partisë. Sekretar i Parë, Kryeministër, Ministër i Jashtëm dhe i Mbrojtjes.
Pas vitit 1952 edhe ai hoqi dorë e mbajti vetëm atë të Sekretarit të parë. Në një “festë syneti” sot Lulzim Basha i cili foli për hapje të shoqatës së tij, u shpall i përjetshëm, i përgjithshëm dhe mori per vete një mori postesh imagjinare.
Pastaj fap e fap përjashtoi po në mënyrë imagjinare ata që nuk i ka. I paaftë që të turpërohet pas 18 vitesh në politikë foli për politikë të re kundër së vjetrës.
Kërkoi ndjesë. Kujt!? Kush do t’ja dijë për ndjesën e tij! Foli për emerime të gabuara që paskësh bërë. Ai na doli shakaja më e madhe dhe emërimi më fatkeq i Sali Berishës.
E zgjodhi të ngratin, duke prishur garën dhe injoruar kontributet në PD për veset jo për virtytet, me konceptin e kontrollit total mbi të e të partisë pronë. Ia futi si kurrkush, si skuth që pret çastin, i pazoti për të bërë betejën e ndarjes me kulturën politike, pa pasur kurrë një projekt. Flet për njerëzit, për demokratët, pasi iu pegërën investimin, mundin për karrigen dhe pasuritë e tyre.
Pa u skuqur, pa u zverdhur, me lëkurën si shollë kepuce, i rrejtën për hallet e tyre orë e çast.
PD duhet të bashkohet, që të fillojë rritjen, të debojë mentalitetin punist të liderëve dhe ushtarëve të përjetshëm. Ajo ka nevojë për garë dhe institucione të vërteta të cilat i japin asaj lidership fitues, përndryshe do t’i mbetet vetëm e kaluara si kujtim dhe copat aktuale si fosile në xhepat e rrënuesve të panginjur e të pacipë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.