.png)
Nga Gazeta ‘Si’-Të rinjtë e papunë të regjistruar në zyrat e punësimit brenda një periudhe 4-mujore do të marrin një ofertë punësimi, trajnimi apo mësimi profesioni.
Kështu parashikon Zbatimi i Skemës së Garancisë Rinore e cila u lancua sot dhe ka për synim integrimin e të rinjve në tregun e punës.
Zëvendësministrja e Financave dhe Ekonomisë, Olta Manjani deklaroi se fillimisht do pilotohet në tri bashki të vendit: Tiranë, Shkodër dhe Vlorë.
“Një nga mekanizmat e rëndësishëm në rritjen e aftësive profesionale dhe që na siguron trajtimin e të rinjve NEET, pra që nuk punojnë dhe nuk ndjekin kurse kualifikimi është Skema e Garancisë Rinore, si pjesë e iniciativës së Bashkimit Europian në Ballkanin Perëndimor. Ne jemi të bindur se Garancia Rinore do të mbështesë të rinjtë, të cilët përballen me pengesa në gjetjen e vendeve të punës dhe fitimin e aftësive të rëndësishme për tregun e punës, duke çuar në mungesën e perspektivës për të ardhmen, e reflektuar në rritjen e kërkesës për emigracion”, deklaroi ajo.
Gjatë fazës së pilotimit, parashikohet të nisë zbatimi i këtij programi duke u mbështetur në punëdhënës të cilët operojnë në të gjithë sektorët e ekonomisë, me fokus të veçantë turizmin dhe energjinë.
Përmes kësaj skeme synohet të mbështeten në total rreth 18 mijë të rinj të moshës 15-29 vjeç.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
