.png)
Ish-mbrojtësi i shquar, Jap Stam, ish-lojtari i Mançester Junajtid, Lacios, Milanit dhe kombëtares holandeze, është emëruar orët e fundit trajneri i ekipit amerikan Sinsinati. Vetëm se kjo aventurë e re ka nisur me një gafë, ndoshta ngaqë amerikanët nuk e kanë sportin kryesor futbollin.
Në njoftimin zyrtar për trajnerin e ri të skuadrës, klubi i Sinsinatit kishte gabuar foton, duke vendosur ndoshta holandezin e parë tullac që kishte gjetur në internet. Një gafë që po bën xhiron në gjithë rrjetet sociale. Njeriu në foto nuk është Jap Stam, por Tinus van Teunenbroek, menaxheri i skuadrës së të rinjve të Ajaksit. Të paktën e ka një lidhje me futbollin…
Në të tilla raste populli i rrjeteve sociale nuk të fal dhe ironia ndaj klubit amerikan ka shpërthyer menjëherë. Kanë qenë të shumta ata që kanë reaguar, duke postuar persona të tjerë të njohur pa flokë, si për shembull, aktorin e famshëm Brus Uillis, apo ish-arbitrin e njohur italian, Pierluixhi Kolina. Klubi i Sinsinatit dhe vetë Stam janë munduar ta kalojnë me sportivitet këtë episod.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
