Funerali i Silvio Berlusconit, liderët e botës dhe politikës i japin sot lamtumirën e fundit

Gazeta Si - Mes rreth 1800 personaliteteve që do të ulen në katedralen e Milanos për funeralin e Silvio Berlusconit, përveç presidentit Mattarella dhe kryeministres Meloni, duhet të jenë të pranishëm edhe disa krerë shtetesh dhe liderë partish italianë dhe të huaj.

Mes tyre, do të jenë Emiri i Katarit Tamim bin Hamad dhe kryeministri hungarez Viktor Orban.

Në ceremoni do të marrin pjesë edhe ministra dhe ambasadorë të ndryshëm të jashtëm, si dhe presidenti i PPE-së, Manfred Ëeber.

Arkivoli i Silvio Berlusconit duhet të mbërrijë në oborrin e kishës së katedrales, ku do të pushojë për disa minuta, në orën 14:50, ndërsa autoritetet pritet të hyjnë në orën 14:45. Predikimi do të bëhet nga kryepeshkopi.

Piazza Duomo do të rrethohet nga ora 10 e mëngjesit të së mërkurës dhe do të ruhet nga forcat e rendit si e gjithë zona.

Priten mijëra qytetarë, të cilët do të mund të marrin pjesë në varrim nga dy ekranet gjigante që janë ngritur për këtë rast.

Për menaxhimin e sheshit, Bashkia e Milanos ka propozuar modelin që përdoret për evente të mëdha, si koncerte, me porta hyrëse për kontrolle, akses të lirë, por në këtë rast do të ketë akses të kufizuar deri në maksimum rreth 10 mijë njerëz.

Më pas, do të ketë një rrugë sigurie për çdo emergjencë, duke qenë se pritet një ditë me diell me maja 27 gradë.

Në “Duomo” të Milanos, nga ana tjetër, rreth 2,000 të ftuar do të mund të ulen.

Hyrjet në katedrale janë në fakt shumë të përzgjedhura: familja do të ulet në anën e djathtë, ndërsa autoritetet në anën e majtë.

Në funeral priten shumë eksponentë politikë, ish-kryeministrat Mario Monti, Mario Draghi, Matteo Renzi, sekretarja e Partisë Demokratike Elly Schlein, Carlo Calenda, 80 deputetë të Forza Italia dhe disa nga ish-ministrat e qeverive të Berlusconit.

Për të garantuar sigurinë në zonën përreth katedrales, do të ketë qitës të zgjedhur me snajper të forcave speciale italiane dhe do të aktivizohen masat anti-terroriste të testuara në ngjarjet më të rëndësishme të sheshit.

Verifikimi i zonës me qen antieksploziv dhe largimi i koshave të mbetjeve do të nisë që në orët e para të mëngjesit.

Për arsye të rendit publik, stacioni i metrosë “Duomo” do të jetë i mbyllur nga ora 10 deri në 18 dhe linjat e ndryshme të tramvajit dhe autobusëve do të devijohen.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.