“Nuk ka arsye pse të jap dorëheqjen”. Josep Maria Bartomeu tha të hënën në mbrëmje këtë fjali, por 24 orë më pas deklaroi largimin nga posti i presidentit, duke mbyllur një erë, që nisi me rezultate shumë të mira, por që u mbyll keq. Bartomeu u mundua me çdo kusht të evitonte referendumin, pas 20 mijë firmave të mbledhura për mocionin e mosbesimit ndaj tij, por nuk ia arriti qëllimit.
Përballë mundësisë për t’u bërë presidenti i parë në historinë e Barcelonës që mund të shkarkohej nga vullneti i popullit katalanas, vendosi të dorëzohet dhe dha dorëheqjen. Ai nuk hipi në avionin që ka çuar skuadrën në Torino për ndeshjen e Championsit me Juventusin dhe në mbrëmje komunikoi dorëheqjen nga posti i presidentit.
Bartomeu e mori presidencën katalanase më 23 janar 2014, pas largimit të Sandro Rosell. Më 18 korrik 2015, pak javë pas fitimit nga Barcelona e drejtuar nga Luis Enrike të tripletës së dytë, Bartomeu u rizgjodh president me 54% të votave, përqindja më e lartë në historinë e klubit. Nga atëherë Barcelona nuk ka fituar më Champions dhe ka pasur probleme njëri pas tjetrit.
Në 2020-ën situata precipitoi brenda dhe jashtë fushe. Shkarkimi absurd i Valverdes, i zëvendësuar nga Kike Setien pas “jo”-së së Ksavit dhe Koeman, “Barçagate” me lojtarët e spiunuar nga një kompani e paguar me një çmim të lartë nga vetë klubi, titulli i humbur, humbja 8-2 me Bajernin, “burofax”-i i Mesit që deshi të largohej dhe mocioni i mosbesimit. Një peshë shumë e rëndë për Bartomeun.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.