Prokuroria e Tiranës ka marrë në pyetje për më shumë se dy orë ish-gjyqtarin Admir Thanza, i cili akuzohet për falsifikim të formularit të dekriminalizimit.
Kjo akuzë lidhet me faktin e zbuluar gjatë procesit të vettingut, ku rezultoi se gjyqtari Thanza nuk kishte deklaruar një dënim penal që kishte marrë në Itali në vitin 1999 për akuzën e vjedhjes. Këtë dënim Admir Thanza e kishte marrë kur ishte gjyqtar në Gjykatën e Shkallës së Parë të Shkodrës dhe pavarësisht këtij dënimi ai ka vazhduar për 22 vite karrierën e tij në Shqipëri duke u zgjedhur deri në shkallët më të larta të drejtësisë në vend, në Gjykatën Kushtetuese.
Ky dënim nuk ka kaluar në heshtje gjatë procesit të vettingut, ku Komisioni i Pavarur i Kualifikimit (KPK) konstatoi dënimin penal. Menjëherë më pas, Prokuroria e Tiranës regjistroi procedimin penal dhe paraditen e së hënës Thanza u thirr si i akuzuar në Prokurorinë e Tiranës.
Mësohet se ish-gjyqtari i lartë i ka qëndruar versionit të tij se veprën e vjedhjes për të cilën është dënuar nuk e ka kryer asnjëherë, por që ka qenë i detyruar të merrte përsipër një veprim të kunatës së tij në mënyrë që të mos rrezikonte kujdestarinë e nipit që duhej të operohej në Itali nga një sëmundje.
Ndërsa mosdeklarimin e këtij dënimi, e ka justifikuar me faktin se kështu ishte këshilluar nga avokati i tij gjatë kohës që kishte plotësuar formularin e dekriminalizimit.
Pas mbarimit të dëshmisë që zgjati rreth dy orë, gjyqtari ka shmangur kamerat duke mos preferuar që të japë asnjë prononcim për mediat. Gjyqtari i Gjykatës së Lartë u shkarkua nga Komisioni i Pavarur të Kualifikimit në korrik të këtij viti.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.