.png)
Gazeta Si - “Finlanda duhet të paraqesë një kërkesë për t’u bashkuar me aleancën ushtarake të NATO-s”, kanë deklaruar presidenti finlandez Sauli Niinisto dhe kryeministrja Sanna Marin në një deklaratë të përbashkët të dhënë ditën e sotme.
Po ashtu, liderët e Finlandës thanë se duhet aplikuar pa vonesë për anëtarësim në NATO.
“Gjatë kësaj pranvere, është zhvilluar një diskutim i rëndësishëm për anëtarësimin e mundshëm të Finlandës në NATO. Është dashur kohë që parlamenti dhe e gjithë shoqëria të vendosin qëndrimet e tyre për këtë çështje. Është dashur kohë për kontakte të ngushta ndërkombëtare me NATO-n dhe vendet anëtare të saj, si dhe me Suedinë. Anëtarësimi në NATO do të forconte sigurinë e Finlandës. Si një anëtare e NATO-s, Finlanda do të forconte të gjithë aleancën e mbrojtjes. Finlanda duhet të aplikojë për anëtarësim në NATO pa vonesë. Shpresojmë që hapat kombëtarë që duhen ende për të marrë këtë vendim do të ndërmerren me shpejtësi brenda ditëve në vijim“, thanë Niinisto dhe Marin në një deklaratë të përbashkët.
Kjo lëvizje është një ndryshim i madh i politikës i shkaktuar nga pushtimi i Ukrainës nga Rusia.
Finlanda, e cila ndan një kufi prej 1,300 km (810 milje) dhe një të kaluar të vështirë me Rusinë, duket se do të marrë hapin e rëndësishëm. Megjithatë pritet për t’u parë se çfarë do të ndodhë.
Sekretari i Përgjithshëm i Aleancës Atlantike, Jens Stoltenberg, saktësoi menjëherë se “Aderimi i Finlandës në NATO do të bëhet pa probleme dhe shpejt”.
Ndërkohë, Rusia është kërcënimi më i drejtpërdrejtë për rendin ndërkombëtar për shkak të luftës së saj barbare në Ukrainë, ka paralajmëruar presidentja e Komisionit Evropian Ursula von der Leyen.
Duke folur pas bisedimeve të së enjtes në Tokio me kryeministrin japonez Fumio Kishida, ajo përmendi gjithashtu paktin shqetësues të Moskës me Kinë".
Në samitin në kryeqytetin japonez mori pjesë edhe presidenti i Këshillit Evropian Charles Michel.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
