Gazeta Si - Franca do t'i ndalojë studentet islamike që të vijnë në shkollë të veshura me “abaya”, veshje tradicionale që mbulon trupin e gruas nga shpatullat te këmbët, shpesh e shoqëruar nga një vello që e lë vetëm fytyrën të zbuluar.
Kështu ka bërë të ditur ministri i Arsimit, Gabriel Attal gjatë një interviste për televizionin TF1.
Attal shtoi se po përgatitet të transmetojë "rregulla të qarta në nivel kombëtar" për të gjithë drejtuesit e shkollave.
Vendimi rrezikon të hapë një "luftë të re kulturore" dhe jo vetëm me komunitetet e shumta islame të Francës, vetëm pak javë pas trazirave që i vunë flakën lagjeve periferike të shumë qyteteve të vendit.
Ministri Attal e bëri të ditur vendimin e tij pak ditë pas rihapjes së shkollave në Francë, duke e cilësuar atë si “të domosdoshëm dhe të drejtë”.
“Shkolla e Republikës u ndërtua mbi vlera të forta, në veçanti mbi laicizmin. Laiciteti është një liri, jo një kufizim. Nuk duhet të përcaktohet feja e një studenti duke hyrë në një klasë". Attal u emërua shef i arsimit publik korrikun e kaluar.
“Abaja” është një fustan që mbulon tërë trupin, përveç kokës, dhe kombinohet me një hixhab apo mbulesë tjetër e kokës nga gratë myslimane në vende e botës myslimane, kryesisht në Lindjen e Mesme.
Ditët e fundit, ministria kishte publikuar një raport, i cili nënvizonte se natyra laike e shkollës ishte nën sulm: mbi 4700 raste në të cilat nxënësit kishin shkelur ndalimin e shfaqjes së simboleve fetare u raportuan gjatë vitit të kaluar shkollor.
Që nga viti 2004, Franca ka ndaluar kryqet, kippahët hebrej dhe mbulesat islame në shkolla: “abaya” ishte toleruar deri më tani.
Mbështetësit e laicizmit denoncojnë se simbolet fetare, në veçanti ato myslimane, po pushtojnë hapësirën publike, ndërsa kritikët, përkundrazi, e konsiderojnë diskriminuese ndalimin e dikujt që të demonstrojë përkatësinë e tij fetare.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.