Paris Saint-Germain ka mundur Lyon 6-5 me penallti (0-0 pas kohës shtesë) duke siguruar trofeun e Kupës së Ligës Franceze për herë të nëntë në histori. Navas pret penalltitë e Traore dhe Sarabia nënshkruan penalltinë vendimtare që u jep sukses parisienëve. Skuadra e drejtuar nga Tuchel ngrenë trofeun për herë të nëntë, mbase dhe të fundit përgjithmonë: Kupa e Ligës Franceze do të pezullohet nga sezoni i ardhshëm.
Një ndeshje ku parisienët mbajtën zotërimin e topit 56%, por ku rastet numërohen me pikatore. Pa Mbappe të dëmtuar, e gjithë loja e kryeqytetasve ishte përqendruar tek Neymar, që nuk arriti ta zgjidhte ndeshjen në kohën e rregullt, e as në 30 minutat e shtesës. Dëmtimi i Icardit dhe Kurzawa bëri të vetën, pa përmendur këtu se Garcia kishte blinduar prapavijën për të përdorur kundërsulmin. Asnjëra nuk ia doli të gjejë rrugën e rrjetës, jo për 90 minuta, por as për 120 minuta lojë.
Pas kësaj skuadrat iu drejtuan 11-metërshave, aty ku përsëri ishin të barabarta deri te penalltia e 6-të kur Traore gaboi për Lionin, me gjuajtjen që iu ndal nga Navas, ndërsa Sarabia u tregua i saktë dhe trofeu i Kupës së Francës shkoi për parisienët. Ky është trofeu i katërt sezonal për PSG pasi më herët kanë fituar Superkupën e Francës, kampionatin dhe Kupën e Francës.
Për të dy skuadrat tani përqëndrimi është në Champions League, ku PSG do të përballet me Atalanta në çerekfinale, ndërsa Lyon do të zhvillojë ndeshjen e kthimit përballë Juventus në Torino, ku e kanë fituar takimin e parë në stadiumin Groupama me rezultatin 1-0.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.