Franca kërkon që të gjitha parkingjet e mëdha të mbulohen me panele diellore

Legjislacioni i miratuar nga Senati do të zbatohet për parkingjet ekzistuese dhe të reja me hapësirë për të paktën 80 automjete.

14:17 - 23 Nëntor 2022

Të gjitha parkimet e mëdha të makinave në Francë do të mbulohen nga panele diellore sipas legjislacionit të ri të miratuar si pjesë e lëvizjes së presidentit Emmanuel Macron për energjinë e rinovueshme.

Legjislacioni i miratuar nga Senati francez këtë javë kërkon që parkingjet ekzistuese dhe të reja me hapësirë për të paktën 80 automjete të mbulohen me panele diellore.

Pronarët e parkingjeve me nga 80 deri në 400 vende kanë pesë vjet kohë për të zbatuar masat, ndërsa operatorët e atyre me më shumë se 400 do të kenë vetëm tre vjet. Të paktën gjysma e sipërfaqes së vendeve më të mëdha duhet të mbulohet nga panele diellore.

Qeveria franceze beson se masa mund të gjenerojë deri në 11 gigavat energji.

Politikanët francezë po shqyrtojnë gjithashtu propozimet për të ndërtuar ferma të mëdha diellore në tokë të papërdorur afër autostradave dhe hekurudhave, si dhe në tokë bujqësore.

Pamja e makinave të parkuara nën hijen e paneleve diellore nuk është e panjohur në Francë. Renewables Infrastructure Group, një nga investitorët më të mëdhenj specialistë të energjisë së gjelbër në Mbretërinë e Bashkuar, ka investuar në një park të madh makinash diellore në Borgo.

Macron ka “hedhur” peshën e tij pas energjisë bërthamore gjatë vitit të kaluar dhe në shtator njoftoi planet për të nxitur industrinë e energjisë së rinovueshme të Francës. Ai vizitoi fermën e parë të erës në det të hapur në portin e Saint-Nazaire në bregun perëndimor dhe shpreson të përshpejtojë kohën e ndërtimit të parqeve me erë dhe parqeve diellore.

Lëvizja vjen pasi vendet europiane shqyrtojnë furnizimet e tyre të brendshme me energji si pasojë e pushtimit rus të Ukrainës.

Qeveria ka nisur gjithashtu një fushatë komunikimi të quajtur "Çdo gjest ka rëndësi", duke inkurajuar individët dhe industrinë të shkurtojnë përdorimin e energjisë dhe dritat e Kullës Eifel po fiken më shumë se një orë më parë.

Qeveria franceze po planifikon të shpenzojë 45 miliardë euro për të mbrojtur familjet dhe bizneset nga goditjet e çmimeve të energjisë.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.