.png)
Franca do të jetë vendi i parë europian që do të hyjë sërish në karantinë, me mbërritjen e valës së dytë të pandemisë. Mediat franceze raportojnë sot se presidenti francez, Emmanuel Macron pritet të njoftojë zyrtarisht hyrjen në një karantinë katërjavore për të ndaluar përhapjen e Covid-19. Vendimi vjen pas rritjes rekord të rasteve të reja në Francë, të cilat kanë çuar në mbingarkimin e spitaleve dhe një rritje befasuese të viktimave nga koronavirusi.
Macron pritet të mbajë një fjalim televiziv të ,ërkurën në mbrëmje pasi të ketë mbajtur një takim të dytë emergjent me ministrat e qeverisë. Kryeministri, Jean Castex, gjithashtu u takua me udhëheqësit e sindikatës së punëtorëve dhe partitë e opozitës për t’u shpjeguar nevojën për shpalljen e një bllokimi kombëtar.
Në qytetet më të mëdha të Francës, përfshirë Parisin, është ndaluar plotësisht qarkullimi gjatë natës, por zyrtarët thonë se kjo nuk ka qenë e mjaftueshme për të frenuar virusin. Në mediat franceze ka pasur spekulime se qeveria do të vendoste bllokime të pjesshme në zonat më të goditura nga Covid-19. Sidoqoftë, të martën në mbrëmje u raportua gjerësisht se Macron do të shpallte një izolim kombëtar katër-javor të ngjashëm me bllokimin dymujor të vendosur në mars dhe prill.
Deri më tani mësohet se të gjitha baret dhe restorantet në të gjithë vendin do të urdhërohen të mbylleshin, ndërkohë që dyqanet që do të lejohen të qëndrojnë të hapura janë ato që shesin mallra thelbësore, si gjatë bllokimit të pranverës.
“Le Monde” raportoi se burime zyrtare kishin konfirmuar që shkollat fillore dhe shërbime të caktuara publike do të mbeteshin të hapura, por raporte të tjera sugjeruan që shkollat e mesme dhe të mesme do të mbyllen.
Në mars, shumica e rasteve në Francë ishin në lindje të vendit, por tani infeksionet po përhapen në të gjithë vendin dhe spitalet po tej mbushen. Franca regjistroi një rekord 52,000 raste të reja të dielën, por ekspertët thonë shumica e të infektuarve janë asimptomatikë, duke bërë që numri i mundshëm i të prekurve të jetë shumë më i lartë.
Këshilli shkencor francez vlerëson se ka të paktën 100,000 raste të reja në ditë, tha presidenti i këshillit Jean-François DelFraissy të hënën në RTL Radio. DelFraissy e përshkroi situatën e epidemisë si "shumë të vështirë, madje kritike".
"Ne kishim parashikuar se do të kishte këtë valë të dytë, por jemi të befasuar nga brutaliteti i asaj që ka ndodhur gjatë dhjetë ditëve të fundit," shtoi ai.
Dhjetë ditë më parë, qeveria franceze shpalli sërish gjendjen e jashtëzakonshme për të lejuar zbatimin e masave më të rrepta shëndetësore për të frenuar përhapjen e virusit. Por shumë ekspertë thonë se vendi ka humbur kontrollin e epidemisë.
"Virusi është aq i pranishëm sa mendoj se sot nuk kemi ndonjë zgjidhje tjetër. Duhet të bllokohemi përsëri," thotë Eric Caumes, shefi i shërbimeve infektive në Spitalin Pitié-Salpêtrière në Paris. "Ne kemi humbur kontrollin e epidemisë disa javë më parë”.
Shtrimet në spital të koronavirusit u rritën me 8,000 pacientë të infektuar brenda dy javësh
"Kur nuk prekemi, ne mendojmë se jemi të paprekshëm," tha kryeministri francez Jean Castex javën e kaluar, duke e përshkruar më parë situatën si "kritike". "Askush nuk mund ta konsiderojë veten të sigurt nga kjo pandemi, madje edhe të rinjtë," shtoi Castex.
Në disa qytete në Francë, baret janë të mbyllura, por restorantet, kinematë dhe teatrot mbeten të hapura. /Burimet: The Guardian, Le Monde. Përshtati: Gazeta "Si"
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
